İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 278 Hüküm no: 221 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraylı Nevhiz’in, Ömer b. Receb’in bir miktar eşya ve parasına el koyduğunu iddia ettiği Mazbata kaydı Bârgâh-ı mu‘allâ kapıcıbaşılarından Şirinzâde Halil Bey zevcesi Saraylı Nevhîz nâm-ı diğer Emine Kadın bt. Abdullah diğer arzuhâl bâlâsına sâdır olan fermân-ı cihân-mutâ‘larına imtisâlen Çarşamba günü Arz Odası’nda huzûr-ı sâtı‘u’n-nûr-ı âsafânelerinde ma‘kūd meclis-i şer‘-i münîrde esir celebânından sahib-i arzuhâl el-Hâc Ömer b. Receb nâm kimesne muvâcehesinde ben ve merkūm el-Hâc Ömer Abaza cinsinden olmamızla bundan akdem karındaşım deyü bana haber gönderip ben dahi Üsküdar’da İnâdiye nâm mahâlde kâin konağıma da‘vet ve birkaç gün iskân ve ikāmet ile uhuvvetimiz vâki‘ midir tahkīk için musâhabetimiz esnâsında bin iki yüz otuz beş senesi Cemâziyelevveli’nin beşinci günü esâmî ve evsâf ve eşhâsını ta‘yîn ve zabtettirdiğim Müslimîn huzûrlarında yedi bin guruşa mu‘âdil mâlımdan yüz elli aded yirmi beşlik ve yüz aded yirmi beşlik nısfiyesi ve iki yüz elli aded dörderlik atîk nısfiye ve dört yüz aded pârelik rub‘iyemi mezbûr el-Hâc Ömer’e ifrâz ve teslîm ve kezâlik mâlımdan kırk top Mağnisa alacasının beher topunu on ikişer buçuk guruş ve yüz top kırmızı bezin dahi beher topunu beşer guruş semen tesmiyesiyle yine mezbûr el-Hâc Ömer’e bey‘ ve temlîk ve teslîm eylediğimde ol dahi ber-tıbk-ı muharrer iştirâ ve iktirâz ve tesellüm ve kabz ve kabûl ettikden sonra karındaşım [44b] olmadığı bi’l-mükâleme zâhir olmuşdu el-hâletü hâzihî nakd-i merkūm yedi bin guruş ile sâlifü’z-zikr alaca ve bezlerin semen-i müsemmâları olan iki bin guruş ki cem‘an sekiz bin guruşu mezbûr el-Hâc Ömer’den taleb ederim deyü da‘vâ ettikde ol dahi cevâbında müdde‘iyye-i mezbûre beni karındaşım deyü işidip da‘vet etmekle ben dahi konağına varıp birkaç gün ikāmet ve ba‘dehû karındaş olmadığımız zâhir olup avdet etmişdim deyip nukūd-ı mezkûreyi iktirâzını eşyâ-i mezkûreyi iştirâsını külliyen inkâr etmekle müdde‘iyye-i mezbûre ber-vech-i muharrer müdde‘âsını ber-vech-i şer‘î beyâna havâle olunup bir dahi zuhûr etmemekle henüz da‘vâlarına faysal verilmediği şehr-i sâbık Cemâziyelevvelinin on ikinci günü târihiyle İstanbul Mahkemesi vekāyi‘-i şer‘iye cerîdesinde mazbût ve mukayyeddir bâkī emr u fermân hazret-i veliyyü’l-emrindir. Fî 27 C sene 1242