İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 279 Hüküm no: 222 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hancı İsmail Çavuş b. İbrahim’in, kereste bedelinden anlaşmazlığa düştüğü zimmilerle 200 guruşa sulh olduğu Husûs ile kereste semeni nizâ‘ından 200 guruşa sulh Ma‘rûz Sâdır olan fermân-ı âlîlerine imtisâlen zikri âtî husûsu mahâllinde istimâ‘ ve fasl u hasmı’çün cânib-i şer‘-i enverden irsâl olunan Kâtib Hasan Şükrü Efendi dâ‘îleri [ve] hâssa mi‘mârı hulefâsından Mustafa Seydâ ve Mehmed Tahir Halîfeler ile İstanbul’da Nûr-ı Osmânî Câmi‘-i şerîfi civârında Mahmud Paşa-yı Velî mahallesinde Kuyulu zukākda vâki‘ Dîvân-ı hümâyûn çavuşlarından Hancı es-Seyyid İsmail Çavuş b. es-Seyyid İbrahim nâm kimesnenin mutasarrıf olduğu bir bâb menzile varıp mahalle-i mezbûre ahâlîsinden Hattât Hasan Efendi b. Halil ve keresteci esnâfının yiğitbaşısı Süleyman Ağa b. Feyzullah nâm kimesneler ile Keresteci İskender oğlu Aci Yani v. İsak zimmî ve sâir mazbûtü’l-esâmî Müslimîn huzûrlarında akd-i meclis-i şer‘-i âlî ettikde sahib-i arzuhâl merkūm es-Seyyid İsmail Çavuş meclis-i ma‘kūd-ı mezkûrda derûn-ı arzuhâlde isimleri mastûr keresteci kābız-ı mâl oğlu Aci Avaniz v. Aci Serkiz ve şerîki Enserci oğlu Mardiros v. Kirkor nâm zimmîler muvâcehelerinde Âsitâne-i aliyyede vâki‘ tüccâr tâifesinin perâkende kolu neferâtından kezâlik derûn-ı arzuhâlde mezkûru’l-ism Gariboğlu Bedros v. Karabet nâm zimmî hazır olduğu hâlde ben bundan akdem menzil-i mezkûru müceddeden binâ ve inşâ eylediğim hînde zimmiyân-ı şerîkân-ı mersûmânın yedlerinden ve mal-ı şirketlerinden kat‘-ı semen olmaksızın ahz ü kabz menzil-i mezkûra vaz‘la istihlâk eylediğim ma‘lûmü’l-ecnâs kerestenin fiyâtını bu def‘a erbâb-ı vukūf olan mi‘mârân-ı mezbûrân ve esnâf-ı hâzırûn-ı merkūmûn ma‘rifetleri ve bundan akdem şeref-sudûr eden fermân-ı cihân-mutâ‘a tatbîkan ma‘rifet-i şer‘le meclis-i ma‘kūd-ı mezkûrda kat‘ olundukda cem‘an kıymetleri bin üç yüz altmış beş guruş beş paraya bâliğ olup benim dahi zimmiyân-ı şerîkân-ı mersûmâna ceste ceste bin sekiz yüz altmış sekiz guruş medfû‘âtım olmağla ol vechile medfû‘âtım olan meblağ-ı mezkûr bin sekiz yüz altmış sekiz guruşun bin üç yüz altmış beş guruş beş parası şerîkân-ı mersûmâna kereste semeninden ber-vech-i muharrer zimmetimde zuhûr eden bin üç yüz altmış beş guruş beş para deynime takās olunup bakīsi olan beş yüz iki buçuk guruş on beş parayı şerîkân-ı mersûmândan taleb ederim deyü da‘vâ eylediğimde onlar dahi cevâblarında semen-i mezkûr bin üç yüz altmış beş guruş beş paranın ceste ceste ancak bin iki yüz kırk guruşunu bize edâ ve teslîm etmekle bâkīsi olan yüz yirmi beş guruş beş parayı taleb ederiz deyip ziyâde altı yüz yirmi altı guruş kabzlarını inkâr ve ol vechile beynimizde ba‘de vukū‘ı’l-münâza‘a muslihûn tavassutuyla beynimiz te’lîf ve tanzîm olunup ben ber-vech-i muharrer tesâddî eylediğim meblağ-ı bâkī-i mezkûr beş yüz iki buçuk guruş on beş para müdde‘âmdan şerîkân-ı mersûmân Aci Avanes ve Mardiros zimmîler ile bi’t-tav‘ ve’r-rızâ iki yüz guruş bedel-i medfû‘ ve makbûza sulh olduğumda onlar dahi sulh-ı mezkûru kabûl ve hâzır-ı mersûm Gariboğlu Bedros zimmî dahi menzil-i mezkûru binâ ve inşâ eylediğim esnâda neccâr kalfası olmak takrîbiyle gerek kendi yevmiye ücreti’çün ve gerek emrimle sâir ameleye vermek için cem‘an mâlımdan verdiğim iki bin yüz otuz altı guruşdan amelenin bâ-fermân-ı âlî kat‘ olunan fiyâtları üzre hesâb olunup ziyâde zuhûr edecek hakkımı taleb ederim deyü tesâddî eylediğim da‘vâmdan dahi meccânen fâriğ olmamla mâ‘adâya ve bi’l-cümle zikrolunan husûslara ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvîden şerîkân-ı mesfûrân Aci Avanes ve Mardiros ile hâzır-ı mersûm Gariboğlu Bedros zimmîlerin zimmetlerini onlar dahi kezâlik bi’l-cümle husûs-ı mezkûra ve işbu târihe gelince sâir cemî‘ hukūk-ı şer‘iyeye müte‘allika âmme-i de‘âvîden benim zimmetimi her birimiz şurût-ı müfsideden ârî ve uhûd-ı mubtıladan berî ibrâ-i âmm-ı sahîh-i şer‘î ve ıskāt-ı tâmm-ı sarîh-i mer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü ikrâr ve tesâduklarını kâtib-i merkūm dâ‘îleri mahâllinde ketb ve tahrîr ve ma‘an meb‘ûs ümenâ-i şer‘den Çukadâr Selim Ağa b. Abdullah ve Muhzır Mehmed Çelebi b. Mehmed ile meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 13 Csene 1242