Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 371 Hüküm no: 421 Orijinal metin no: [67a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Alime bt. Mehmed’in Ali b. İsmail’den muhâlaa yoluyla boşandığı Mahmiye-i İstanbul’da Azebler mahallesinde sâkine olup zâtını Hüseyin b. Mustafa ve Ahmed b. Ahmed nâm kimesneler ta‘rîfleriyle mu‘arrefe olan Alime bt. Mehmed nâm hâtun meclis-i şer‘-i enverde zevci işbu bâ‘isü hâze’l-kitâb Ali b. İsmail nâm kimesne mahzarında ikrâr-ı kelâm edip zevcim mezbûr Ali zimmetinde mütekarrir ve ma‘kūdun-aleyh olan bin akçe mehr-i müeccelimin yüz akçesi hâlâ bana edâ ve teslîm ben dahi yedinden ahz u kabz edip ve iki yüz akçesi dahi târih-i kitâbdan altmış güne değin te’cîl eyledikde ol dahi bana edâya ta‘ahhüd edip bâkī yedi yüz akçe mehr-i müeccelim ve nafaka-i iddet-i ma‘lûmemden geçip mezbûr ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra hukūk-ı zevciyyete ve sâir beynimizde cereyân eden hukūka müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hüseyin b. Mustafa, Ahmed Çelebi b. Ahmed, Nasuh b. Osman, İbrahim Çelebi b. Ahmed, Mahmud b. Ahmed, el-Hâc Mustafa b. Tevekkül.