İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 282 Hüküm no: 224 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil v. Yani’nin, Çarşı-yı Kebir’deki kazzaz gediğini Karabet v. Haçador’a sattığı Kazzâz mübâya‘ası Ma‘rûz Âsitâne-i aliyyede vâki‘ kazzâz esnâfından Vasil v. Yani nâm zimmî meclis-i şer‘-i münîrde bâ‘isü’l-i‘lâm Derzi Karabet v. Haçador nâm zimmî muvâcehesinde İstanbul’da Çarşı-yı Kebîr’de Çağır Ağa zukāğı demekle meşhûr sûkda Kalpakçılar karşısında Dülbendciler zukāğı başından Yağlıkçılar sûkunda basmacı dükkânına müntehî oluncaya değin sûkda kâin tarafeyni Kazzâz Sofdon ve Marki zimmîler dükkânları beynlerinde kâin bir kepenk bir aded kazzâz dükkânı ve derûnunda mevcûde akd-i âti’z-zikrin sudûruna değin Başmuhâsebe kaleminde ismime mukayyed ve mu‘teber beyne’l-esnâf gedik ta‘bîr olunur bâ-sûret müstakillen yedimde mâlım olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin sekiz yüz yirmi beş guruş semen-i medfû‘ ve makbûza mersûm Karabet zimmîye bey‘ ve temlîk ve teslîm eylediğimde ol dahi ber-vech-i muharrer ba‘de’l-iştirâ ve’t-temellük ve’t-tesellüm ve’l-kabz ve’l-kabûl mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik fîmâ-ba‘d gedik ta‘bîr olunan âlât-ı lâzıme-i ma‘lûme mersûm Karabet zimmînin mülk-i müşterâsı ve hakk-ı sırfı olup benim asla ve kat‘an alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘-i mersûm Vasil zimmî üzerinde olan kayd-ı evveli ref‘ ve terkīn ve müşteri-i mersûm Karabet zimmî ismine tasrîhan kayd ile yedine müceddeden kaleminden bir kıt‘a sûret i‘tâsını istid‘â ve istirhâm eylediği İstanbul Mahkemesi’nden huzûr-ı âlîlerine i‘lâm olundu. Fî 4 C sene 1242