İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 283 Hüküm no: 225 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avram v. Yako ile Mosi v. Elya’nın, bağcı ve saçakçı gediklerini İsak v. Mosi’ye devrettikleri Bağcı ve saçakçı gediği mübâya‘ası Ma‘rûz Kazzâz esnâfından Avram v. Yako nâm Yahûdî meclis-i şer‘-i hatîrde esnâf-ı merkūmeden Menahim v. Paruh ve Mosi v. Elya nâm Yahûdiler hazır oldukları hâlde yine esnâf-ı merkūmeden bâ‘isü’l-i‘lâm İsak v. Mosi nâm Yahûdî muvâcehesinde takrîr-i kelâm edip İstanbul’da Çarşı-yı Kebîr’de Takyeci sûkunda vâki‘ Kazzâz Menteş Yahûdî ile Hıncı [Kıncı]? zimmî dükkânları beynlerinde kâin bir bâb bağcı ve saçakçı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme hâzırân-ı mersûmân Menahim ve Mosi Yahûdilerin ale’l-iştirâki’s-seviy bâ-sûret yedlerinde emvâlleri iken hâzır-ı mesfûr Menahim Yahûdî ber-vech-i muharrer mâlik olduğu nısf hisse-i şâyi‘asını şehr-i sâbık Cumâdelûlâ’nın onuncu günü yedi yüz elli guruş semen-i medfû‘ ve makbûza huzûr-ı şer‘de bana bey‘ ve temlîk ve teslîm ben dahi iştirâ ve temellük ve tesellüm ve kabûl edip lâkin nısf gedik-i mezkûr kaleminde ismime tasrîh olunmamış ise de el-yevm gedik-i mezkûrun nısfı benim bilâ-sûret ve nısf-ı âharı hâzırân-ı mersûmândan mesfûr Mosi Yahûdinin bâ-sûret akd-i âti’z-zikrin sudûruna değin münâsafeten yedimizde emvâlimiz olmağla benimle hâzır-ı mersûm Mosi Yahûdiden her birimiz ber-vech-i muharrer münâsafeten mâlikleri olduğumuz gedik ta‘bîr olunan âlât-ı lâzıme-i mezkûreyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm İsak Yahûdiye bin beş yüz guruşa bey‘ ve temlîk ve teslîm eylediğimizde ol dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl semeni olan meblağ-ı mezkûr bin beş yüz guruşu bize def‘ ü teslîm biz dahi yedinden bi’t-tamam ve’l-kemâl ahz ü kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl edip ba‘de’l-yevm gedik ta‘bîr olunan âlât-ı lâzıme-i mezkûrenin mecmû‘u <> mesfûr İsak Yahûdinin emvâl-i müşterâtı ve hakk-ı sırfı olup benimle hâzırân-ı mersûmânın [45b] kat‘a alâka ve medhalimiz kalmamışdır deyü ba‘de’l-ikrâr ve’t-tesâduk gedik-i mezkûrun kaleminde hâzırân-ı mesfûrân üzerlerinde kayd-ı evveli ref‘ ve terkīn-birle müşteri-i mersûm İsak Yahûdî ismine tashîhan kayd ile müceddeden yedine bir kıt‘a sûret i‘tâsını mesfûr İsak Yahûdî istid‘â ve istirhâm eylediği İstanbul Mahkemesi’nden huzûr. Fî 9 C sene 1242