İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 284 Hüküm no: 227 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eminönü’nde taze meyve müdürü için inşa edilecek yerin altına Mehmed Usta’nın berber gediğinin nakli Eminönü’nde meyve-i ter müdîrine mahsûs inşâ olunacak mahâl tahtına berber gediği nakli Sâdır olan fermân-ı âlîlerine imtisâlen sa‘âdetlü defterdâr efendi bendelerinin işbu takrîri mütâla‘a olundukda meyve-i ter idâresine me’mûr olanların ikāmetleri’çün Eminönü ve Yemiş İskelesi’nde münâsib hâlî mahâl olmadığı ve mahsûs mahâl iştirâ ve inşâsı dahi hayli mesârife muhtâc olacağı ecilden el-hâletü hâzihî Eminönü’nde leb-i deryâda âriyeten ikāmet olunan el-Hâc Hâfız Hamza Efendi b. el-Hâc Abdullah’ın dükkânı meyve ve sebzenin bey‘ ve şirâ olunan meydân ve iskelesine nâzır münâsib bir mahâl olmağla tahtında bir bâb berber dükkânı inşâsına ruhsat buyurulur ise fakat yirmi beş guruş mâhiye ile meyve-i ter müdîrlerine mahsûs olarak fevkinde bedeninden üç odalı bir dâire inşâ edeceğini ve bu sûret cânib-i mîrînin mesârifden vikāyesini müstelzim idüğünü beyân-birle dükkân-ı mezkûrun inşâsı muvâfık-ı irâde-i seniyyeleri ise berber gediği tedârik ve naklolunarak tanzîmini meyve-i ter müdîri hâcegân-ı Dîvân-ı hümâyûndan Emin Bey kulları bâ-takrîr inhâ eylediği ve İstanbul’da Kapalıfırın’da bakkāl karşısında Mehmed Usta dükkânı gediği mahâll-i mezkûra naklolunmak üzre tedârik ettirildiği ve gedik-i mezkûr Başmuhâsebe’de mukayyed ve mu‘teber ve bu makūle mukayyed olan berber dükkânı gediğinin mahâll-i kadîminden âhar mahalle nakl ve tahvîli iktizâ ettikde esnâf-ı mezkûre kethudâsı ve nizâm ustaları ve muahharan gedik i‘tibâr olunacak dükkânın mutasarrıfları huzûr-ı şer‘de hazır oldukları hâlde ba‘de’t-tahkīk i‘lâm olundukdan sonra ber-mûcib-i i‘lâm ismine tasrîhan nakli derciyle sûret verilmek nizâmından olduğu müstebân olmağla Âsitâne-i aliyyede vâki‘ berber esnâfından es-Seyyid Mehmed Emin b. Mahmud nâm kimesne meclis-i şer‘-i münîrde merkūm el-Hâc Hâfız Hamza Efendi mahzarında esnâf-ı mezkûre kethudâsı İbrahim Ağa ve şeyhi el-Hâc Abdi Efendi ve du‘âcısı İsmail Efendi ve yiğitbaşısı es-Seyyid Mehmed Nuri Ağa ve çavuşu Molla Mustafa ve köşe ustası İsmail Usta ve sâir nizâm ustaları ile muahharan gedik i‘tibâr olunacak dükkân-ı mezkûrun mülk sahibleri ta‘bîr olunur bi’l-icâreteyn iştirâken ve şâyi‘an mutasarrıfları Karahisârîzâde Süleyman Bey ibnü’l-merhûm Ahmed Paşa tarafından ber-vech-i âtî tasdîk ve icâzete vekîl olduğu el-Hâc Hüseyin Ağa b. Mehmed ve İsmail Ağa b. Ahmed şehâdetleriyle sâbit olan es-Seyyid Mehmed Efendi b. İbrahim ve müşterekleri Nazife Hanım ibnetü’l-merhûm Karahisârîzâde Ömer Bey ve Düriye Hanım ibnetü’l-merhûm Kudsî Mehmed Efendi taraflarından kezâlik vekîl olduğu şâhidân-ı mezbûrân şehâdetleriyle sâbit olan mûmâ-ileyhâ Nazife Hanım’ın zevci el-Hâc Ahmed Efendi b. Süleyman hazır oldukları hâlde takrîr-i kelâm edip sâlifü’z-zikr Kapalıfırın’da bakkāl karşısında kâin bir bâb berber dükkânı derûnunda mevcûde gedik ta‘bîr olunur tedâvül-i eydî ile şirâen mâlik olduğum beş ustura ve bir kayış ve bir tas ve bir sitil ve bir ayna ve bir bileği taşı ve bir tepsi ve bir mikrâs ve bir cınbız ve bir tarak ve sâir âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin dört yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr merkūm el-Hâc Hamza Efendi’nin mülk-i müşterâsı ve hakk-ı sırfı olup benim kat‘a alâka ve medhalim kalmamışdır deyü takrîr ve tasdîk eyledikleri ve gedik-i mezkûr mahalli eşedd-i lüzûma binâen menzile ilâve olunmağla müvekkilûn-ı mûmâ-ileyhimin bi’l-icâreteyn mutasarrıflar oldukları Ayasofya-i Kebîr Vakfı’ndan İstanbul’da Eminönü’nde Tütüncü Sünbül zimmî ve Yemişçi İbrahim mağazaları beynlerinde kâin mezbûr el-Hâc Hamza [46a] Efendi’nin müste’ciren sâkin olduğu âhar gedikden ârî derûn-ı takrîrde inhâ olunan bir bâb dükkâna nakline müvekkilûn-ı mûmâ-ileyhim izin verdiklerini vekîlleri mezbûrân bi’l-vekâle ifâde ve bâyi‘-i mezbûrun bey‘ eylediği gedik sâlifü’l-beyân Mehmed Usta ismine mukayyed ve mu‘teber gedik olduğunu esnâf-ı hâzırûn-ı mezbûrûn ihbâr ettikleri ve ol vechile bi’t-tamam nizâmına tatbîk olunduğu ma‘lûm-ı ilm-i âlem-ârâları buyruldukda husûs-ı mezkûra müsâ‘ade-i seniyyeleri erzânî buyurulur ise gedik-i mezkûrun isim ve mahâll-i evveli kaydları kaleminden ref‘ ve terkīn ve ber-mûcib-i inhâ fevkine meyve-i ter müdîri dâiresi inşâ etmek üzre dükkân-ı mezkûra nakl ve ismine tashîhan kaydolunarak nakl ve tashîhi derciyle merkūm el-Hâc Hamza Efendi yedine sûret ve müdîr-i mûmâ-ileyh tarafına dahi ilm u haber i‘tâsı iktizâ eylediği İstanbul Mahkemesi’nden huzûr. Fî 27 C sene 1242