İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 287 Hüküm no: 230 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Tütüncü Hasan Ağa b. Ahmed’in tütüncü gediğini veresesinin, Mehmed Ağa b. Hüseyin’e sattığı Tütüncü mübâya‘ası ve ismine kaydı Ma‘rûz Bundan akdem fevt olan Tütüncü es-Seyyid Hasan Ağa b. es-Seyyid Ahmed’in sulbî kebîr oğlu es-Seyyid Ahmed ile zâtları mu‘arrefe zevce-i metrûkesi Hafize bt. Mehmed ve sulbiye kebîre kızı Şerife Nefise Hatunlar meclis-i şer‘-i münîrde es-Seyyid Mehmed Ağa b. Hüseyin muvâcehesinde esnâf-ı merkūme kethudâsı <<İbrahim>> Osman Ağa ve yiğitbaşısı Molla Osman ve sâir nizâm ustaları hazır oldukları hâlde müteveffâ-yı mezbûrun bâ-sûret mâlı olup ba‘de vefâtihî bize mevrûs olan İstanbul’da Sarı Musa Câmi‘-i şerîfi civârında enserci ve attar dükkânları beynlerinde kâin üç kepenk bir bâb kârgir tütüncü dükkânı derûnunda mevcûde gedik ta‘bîr olunur âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin yüz yirmi guruş semen-i makbûza mezbûr es-Seyyid Mehmed Ağa’ya bi’l-verâse bey‘ ve temlîk ve teslîm ol dahi iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d âlât-ı gedik-i mezkûr merkūm es-Seyyid Mehmed Ağa’nın mal-ı müşterâsı olup bizim alâkamız kalmamışdır deyü ba‘de’l-ikrâr ve’t-tasdîk gedik-i mezkûrun müteveffâ-yı mezbûr ismine olan kaydı ref‘ ve terkīn ve merkūm es-Seyyid Mehmed Ağa ismine kayd ile yedine sûret i‘tâsını istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 29 C sene 1242