İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 296 Hüküm no: 241 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katırcı Halil b. Mustafa’nın, sâbık Sofya Kadısı Abdülkerim Efendi’den alacağı olduğu iddiasının geçersizliği 110 guruş bargir ücreti men‘i Ma‘rûz Katırcı tâifesinden Kütahyalı Çalakçı oğlu Halil b. Mustafa nâm kimesne meclis-i şer‘-i münîrde mevâlî-i fihâmdan sâbıkā Sofya kādısı fazîletlü es-Seyyid Abdülkerim Efendi ibnü’l-merhûm Ahmed Efendi muvâcehesinde mûmâ-ileyh es-Seyyid Abdülkerim Efendi bundan akdem kazâ-i mezbûrdan azl ve infisâllerinden Âsitâne-i aliyyeye gelir iken yirmi iki re’s bargirimi kazâ-i mezbûrdan İstanbul’a kadar rukûb ve ahmâl ve eskālini tahmîl için beher re’sini ellişer guruş ücret tesmiyesiyle istîcâr ve ber-vech-i muharrer rukûb ve tahmîl-i eşyâ ile Der-aliyye’ye geldikden sonra ecr-i müsemmâm olan cem‘an bin yüz guruşun beher re’sini kırk beşer guruş hesâbıyla ancak dokuz yüz doksan guruşunu bana teslîm edip mâ‘adâ beher re’si beşer guruşdan yüz on guruşu vermemekle suâl olunup meblağ-ı bâkī-i merkūm yüz on guruşu mûmâ-ileyh es-Seyyid Abdülkerim Efendi’den taleb ederim deyü da‘vâ ettikde ol dahi cevâbında ben zikrolunan yirmi iki re’s bargiri müdde‘î-i mezbûrdan ancak beher re’sini kırk beşer guruşa istîcâr etmişdim deyü ziyâde müdde‘âsını inkâr etmekle müdde‘î-i mezbûr ber-vech-i muharrer ziyâde îcâr müdde‘âsını isbâta kādir olamayıp talebiyle mûmâ-ileyh es-Seyyid Abdülkerim Efendi’ye bi’l-muvâcehe vech-i şer‘î üzre yemîn verilmeğin mûcibince müdde‘î-i mezbûr Halil ber-vech-i muharrer ziyâde müdde‘âsıyla mûmâ-ileyh es-Seyyid Abdülkerim Efendi’ye bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 6 min-Recebi’l-ferd sene 1242