Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 372 Hüküm no: 423 Orijinal metin no: [67a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi b. Abdullah’ın vefat eden Hacı Hüseyin b. Mustafa’da olan alacağının terekesinden alıverilmesi Min mümzâtihî Mahmiye-i İstanbul’a Yeniçarşı’da sâkin attâr tâifesinden işbu bâ‘isü’l-kitâb Hasan Çelebi b. Abdullah meclis-i şer‘-i şerîf-i enverde sakabaşı iken bundan akdem vefât eden el-Hâc Hüseyin b. Mustafa b. Hüseyin’in verâseti li eb kız karındaşları Hatice ve Döndü ve li üm kız karındaşları Fâtıma ve Âsiye bintey Ali’ye münhasıra olduğu şer‘an zâhir ve müte‘ayyin oldukdan sonra mezbûrât muvâcehelerinde üzerlerine da‘vâ ve takrîr-i kelâm [edip] ben merkūm el-Hâc Hüseyin’e hayâtında hacc-ı şerîfe müteveccih oldukda kendi dükkânımda beş yüz guruşluk para-i Mısrî ikrâz ve teslîm ol dahi iktirâz ve kabz [67b] ve kendi mesârifine sarfla istihlâk edip kable’l-edâ fevt olmağın terekesini mezbûrlar kabz etmeğin suâl olunup tereke-i vâfiyesinden meblağ-ı mezbûrun alıverilmesi matlûbumdur dedikde gıbbe’s-suâl mezbûrât cevâb[ların]da, tereke-i müteveffâ-yı mezbûra vaz‘-ı yedlerini ikrâr lâkin deyn-i mezbûru inkâr edicek müdde‘î-i mezbûrdan müdde‘âsına [mutâbık] beyyine taleb olundukda udûl-i müslimînden olup mahmiye-i mezbûrede Hocapaşa mahallesinde sâkin Mustafa Ağa b. Ahmed ve Alacahamam kurbunda Çelebioğlu mahallesinde sâkin Ahmed Ağa b. Mustafa nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr sakabaşı el-Hâc Hüseyin b. Mustafa b. Hüseyin mukaddemâ hâl-i hayâtında hacc-ı şerîfe müteveccih oldukda işbu müdde‘î-i mezbûr Hasan Çelebi mârrü’z-zikr dükkânında bizim huzûrumuzda beş yüz guruşluk para ikrâz ve teslîm mezbûr el-Hâc Hüseyin dahi iktirâz ve kabz ve tesellüm etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiyye şehâdetleri makbûle olmağın meblağ-ı mezbûru hayâtında mezkûr el-Hâc Hüseyin’den küllen ve ba‘zan ahz u kabz veya hibe veya âhara havâle etmeyip ve’l-hâsıl vücûh-ı şer‘iyyeden bir vechile zimmetini ibrâ etmediğin mezbûr Hasan Çelebi’ye bi’t-taleb ketb olundu. Fi’l-yevmi’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Mustafa b. el-Hâc Ahmed, Mehmed Efendi b. Mustafa, Mehmed b. İdris, el-Hâc Mustafa b. Tevekkül.