Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 373 Hüküm no: 424 Orijinal metin no: [67b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Ali’nin terekesinden küçük çocuklarına nafaka takdir edilmesi Mahmiye-i İstanbul’da Sunullah Efendi mahallesi sükkânından iken bundan akdem vefât eden Hasan b. Ali nâm kimesnenin sulbiye sagīre kızları İsmihan ve Emine ve Ayşe’nin vâlideleri ve hâdıneleri Cennet bt. Seher nâm hâtun meclis-i şer‘-i şerîf-i enverde takrîr-i kelâm ve ta‘bîr ani’l-merâm edip sagīrât-ı mezbûrât bi hakki’l-hidâne benim hucr ve terbiyyemde olmağla babaları müteveffâ-yı mezbûrdan kendilere isâbet edip vasîleri olan işbu hâzır bi’l-meclis Ali Çelebi b. Süleyman yedinde mazbûta olan mâllarından her birine beher yevm kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri dahi sagīrât-ı mezbûrâta babaları müteveffâ-yı mezbûrdan müntakil olup yed-i vasîde mazbûta olan mâllarından her birine beher yevm beşer akçeden târih-i kitâbdan cem‘an on beş akçe nafaka ve kisve-bahâ farz ve takdîr edip meblağ-ı mefrûz-ı mezbûru istidâne ve sarfa ve lede’z-zafer mâl-ı mezbûra rücû‘a merkūme Cennet Hâtun’a izin vermeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İbrahim Çelebi b. Ahmed, Ali b. Bâli, Mehmed b. İdris.