İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 298 Hüküm no: 243 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Veliyüddin ile İsmail b. Ali’nin, feshettikleri ortaklıklarında 300 guruşa sulh oldukları 300 guruşa sulh ve bedel-i sulhü beher şehr onar guruşa te’hîr Ma‘rûz Sahib-i arzuhâl Mehmed b. Veliyüddin nâm kimesne meclis-i şer‘-i münîrde derûn-ı arzuhâlde mezkûru’l-ism İsmail b. Ali nâm kimesne muvâcehesinde ben târih-i i‘lâmdan yedi sene mukaddem mâlımdan bin guruş ve merkūm İsmail dahi mâlından beş yüz guruş ifrâz ve birbirine halt ile fâide-i hâsıla beynimizde beraber iktisâm olunmak üzre İstanbul’da Çarşı-yı Kebîr’de Bat Pazarı’nda vâki‘ dükkânımda koltukçuluk ticâretinde akd-i şirket ile bir sene şerîkler olup ba‘dehû fesh-i akd-i şirket-birle hesâbımızı mahzar-ı şühûdda sehv ve galatdan ârî yegān yegān sahîhan rü’yet eylediğimizde merkūm İsmail kābız-ı mâl olmak takrîbiyle hâsıla olan fâideden benim nısf hisseme isâbet eden mebâliğ-i ma‘lûmeyi bana def‘ ü teslîm ben dahi ahz ü kabz edip lâkin re’s-i mâlım olan meblağ-ı mezkûr bin guruşu bana vermeyip kendi umûruna sarfla istihlâk etmemle meblağ-ı merkūm bin guruşu mezbûrdan zamânen taleb ederim deyü tesâddî eylediğim da‘vâmdan bâ-tavassut-ı muslihîn mezbûr İsmail ile bi’t-tav‘ ve’r-rızâ üç yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ meblağ-ı merkūm bin guruşa varınca ziyâdesi olan yedi yüz guruş ile mal-ı şirketden hâric yedimde mâlım olup bi-gayr-ı hakkın mukaddemâ âhara bey‘le istihlâk eylediği seksen guruş kıymetli bir çuka biniş ve elli guruş kıymetli bir çuka cübbenin kıymetleri olup zimmetinde zamânen alacak hakkım olan cem‘an yüz otuz guruşdan meccânen fâriğ olmamla kıymet-i mecmû‘-ı mezkûra ve bi’l-cümle husûs-ı şirkete ve hesâbda galat vukū‘una müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve ıskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr üç yüz guruşu mezbûrun hâlâ ve def‘aten edâya iktidârı olmayıp ber-vech-i âtî istimhâl eylediğinde ben dahi bedel-i sulh-ı mezkûru beher şehr onar guruş verip mecmû‘unu târih-i i‘lâmdan otuz ay tamamında tamamen bana edâ ve îfâ etmek üzre rızâmla medyûnum merkūm İsmail’i imhâl ve te’hîr eyledim dedikde ol dahi kazıyye minvâl-i meşrûh üzre olup bedel-i sulh-ı mezkûr üç yüz guruş zimmetinde müdde‘î-i mezbûra sahîhan deyni olduğunu ikrâr ve i‘tirâf ve ber-vech-i muharrer muahharan dâyini müdde‘î-i merkūm Mehmed’e tamamen edâ ve îfâya müte‘ahhid olduğu İstanbul Mahkemesi’nden huzûr. Fî-gurreti C sene [1]242