İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 306 Hüküm no: 251 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tunuslu Uzun Süleyman Ağa b. Hasan’ın, Mısır tüccarından Yusuf Ağa b. Abdullah’a olan borcunu ödediği 5752 guruş duhan semenini kabz ve ibrâ Ma‘rûz Sahib-i arzuhâl duhan tüccârından Yeniceli es-Seyyid İbrahim Ağa b. es-Seyyid el-Hâc Hüseyin bi’t-terâzî dâ‘îhânelerinde ma‘kūd meclis-i şer‘-i münîrde Tunuslu Uzun Süleyman Ağa b. el-Hâc Hasan muvâcehesinde derûn-ı arzuhâlde mezkûru’l-ism Mısır tüccârından Yusuf Ağa b. Abdullah hazır olduğu hâlde bundan akdem ben mâlımdan beş bin sekiz yüz kırk sekiz vakıyye duhanımın beher vakıyyesini doksan paradan sekiz bin altı yüz elli sekiz guruş semen tesmiyesiyle hâzır-ı merkūm Yusuf Ağa’ya ol dahi mâlından üç re’s kebîre ve bir re’s sagīre ki cem‘an dört nefer zenciye câriyelerini bi-safkatin vâhidetin beş bin guruş semen tesmiyesiyle bana her birimiz görmedin bey‘ edip ba‘dehû gördüğümüzde beğenmeyip her birimiz hıyâr-ı rü’yetle fesh-i akd-i bey‘ eylediğimizden sonra ben zikrolunan tütünleri semen-i diğer ile merkūm Süleyman Ağa’ya bey‘ ve teslîm etmişdim el-hâletü hâzihî merkūm Süleyman Ağa ile dahi makbûz ve masrûfunun hesâbını bu def‘a yegān yegān sahîhan rü’yet eylediğimizde benim merkūm Süleyman Ağa zimmetinde sahhu’l-bâkī beş bin yedi yüz elli iki guruş alacağım zuhûr ol dahi tasdîk ve tamamen bana def‘ ü teslîm ben dahi ahz ü kabz ve istifâ-yı hak edip ol vechile gerek benim ve gerek merkūm Süleyman Ağa’nın mezbûr Yusuf Ağa yed ve zimmet ve kıbelinde cihet-i mezkûreden ve cihât-ı sâireden vechen mine’l-vücûh ve sebeben mine’l-esbâb bir akçe ve bir habbe ve bir nesne hakkımız ve alacağımız ve bir gûne da‘vâ ve nizâ‘ ve husûmetimiz kalmamağla bi’l-cümle husûs-ı mezkûrlara ve sâir beynimizde cereyân eden cemî‘ ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve mutâlebât ve kâffe-i eymân ve muhâsamâtdan ben ve merkūm Süleyman Ağa’dan her birimiz hâzır-ı mezbûr Yusuf Ağa’nın zimmetini şurût-ı müfsideden ârî ve uhûd-ı mubtıladan berî cebr ü kerhden hâlî ibrâ-i âmm-ı sahîh-i şer‘î ve ıskāt-ı tâmm-ı sarîh-i mer‘î ile ibrâ ve ıskāt eylediğimizde ol dahi ibrâ-i mezkûrumuzu kabûl eyledi deyü mukırr-ı merkūm es-Seyyid İbrahim Ağa’nın bi’l-cümle takrîr-i meşrûhunu hâzır-ı mezbûr Yusuf Ağa ile mezbûr Süleyman Ağa’dan her biri tasdîk ve mezbûr Süleyman Ağa dahi ber-minvâl-i muharrer kabûlü hâvî ibrâ-i âm ile ibrâ ve ıskāt eylediğini tâyi‘an ve kāt‘iyyen ikrâr ve i‘tirâf edip bu vechile külliyen kat‘-ı münâza‘a eyledikleri İstanbul Mahkemesi’nden huzûr-ı âlîlerine i‘lâm olundu. Fî 3 min-Recebi’l-ferd sene 1242