Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 373 Hüküm no: 425 Orijinal metin no: [67b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Beşe b. Mustafa’nın evini Saliha bt. Abdullah’a bey‘ bi’l-istiğlâl yoluyla satması Mahrûse-i Galata’ya tâbi‘ kasaba-i Beşiktaş’da Sinan Paşa mahallesinde sâkin Hüseyin Beşe b. Mustafa meclis-i şerîf-i enverde mahmiye-i İstanbul’da Timurhan mahallesinde sâkin râfi‘atü hâze’l-kitâb Sâliha bt. Abdullah nâm hâtun tarafından husûs-ı âti’l-beyâna vekîl olduğu zât-ı ma‘rifet-i şer‘iyye ilâ ârifân Nasuh b. Mustafa ve Ömer b. Hasan şehâdetleriyle şer‘an sâbit olan el-Hâc Mehmed b. el-Hâc Osman mahzarında ikrâr ve takrîr-i kelâm edip silk-i mülkümde münselik olup mahmiye-i mezbûrda Küçükpazar kurbunda vâki‘ bir tarafdan el-Hâc Receb Pazarbaşı mülkü ve bir tarafdan Mehmed mülkü ve bir tarafdan tarîk-i hâs ve bir [tarafdan] tarîk-i âm ile mahdûd iki fevkānî oda ve bi’r-i mâ ve havluyu müştemil mülk menzil bi tarîki’l-istiğlâl altmış guruşa mezbûreye bey‘ ve teslîm ol dahi iştirâ ve tesellüm edip semeni olan meblağ-ı mezbûr altmış guruşu yedinden tamâmen ahz u kabz eyledikden sonra yine müvekkil-i mezbûr Sâliha Hâtun menzil-i mahdûd-ı mezkûr[u] ba‘de’t-tahliyyeti’ş-şer‘iyye târih-i kitâbdan bir sene tamâmına değin on iki guruşa bana îcâr ve teslîm ben dahi istîcâr ve kabûl ve tesellüm eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Efendi el-İmâm, kalaycı Mustafa b. Ramazan, el-Hâc Hüseyin b. Musa Beşe, el-Hâc Mehmed b. ( ).