İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 308 Hüküm no: 253 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Markar’ın, kirasını geciktirmeden Mehmed Arif Ağa’ya ödeyeceği Zınparacı dükkânının kirâsı olan mâh-be-mâh dörder guruşu bilâ-cevr edâya ta‘ahhüd Ma‘rûz Sahib-i arzuhâl Mehmed Ârif Ağa b. Osman meclis-i şer‘-i münîrde derûn-ı arzuhâlde mezkûru’l-ism Artin v. Markar zimmî muvâcehesinde İstanbul’da Süleymâniye kurbünde Dârü’l-hadîs tahtında vâki‘ bi’l-icâreteyn mutasarrıf olduğum bir bâb vakıf zınparacı dükkânında mersûm Artin zimmî dörder guruş şehriye kirâ ile müste’cirim olup lâkin dükkân-ı mezkûrda mukayyed ve mu‘teber gedik yoğiken zimmî-i mesfûr kirâsını edâda cevr ü ezâ etmekle ben dahi fesh-i akd-i icâre ile mersûmu dükkân-ı mezkûrdan ihrâc murâd etmişdim el-hâletü hâzihî mersûm Artin zimmî dükkân-ı mezkûrdan çıkmamağa şer‘an ve kānûnen kādir olamayacağı erbâbından suâl ve tahkīk ile ma‘lumu olduğundan fîmâ-ba‘d kirâ-yı mezkûru mikdâr-ı zerre cevr ü ezâ etmeksizin mâh-be-mâh tamamen bana edâya ta‘ahhüd ile niyâz ve iltimâs eylediğinde ben dahi da‘vâ-yı mezkûremden fâriğ oldum deyü takrîrini mersûm Artin zimmî tasdîk eylediği İstanbul Mahkemesi’nden huzûr. Fî 16 B sene 1242