İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 309 Hüküm no: 255 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hatice bt. İbrahim’e borcu olan Mehmed b. Hüsnü’nün 400 guruşa sulh olduğu 400 guruşa sulh Zâtı mu‘arrefe Şerife Hadîce bt. es-Seyyid İbrahim nâm hatun meclis-i şer‘-i münîrde kemhâcı esnâfından es-Seyyid Mehmed b. Hasan nâm kimesne muvâcehesinde benim esnâf-ı merkūmeden gāib ani’l-meclis Eyüb b. Mustafa nâm kimesne zimmetinde cihet-i karzdan beş yüz guruş alacağım olup ânın dahi mezbûr es-Seyyid Mehmed zimmetinde kemhâcı destgâhı semeninden ol mikdâr hakkı olmağla medyûnum gāib-i mezbûr Eyüb deyn-i mezkûruyla beni medyûnu merkūm es-Seyyid Mehmed üzerine şerâit-i şer‘iyesi üzre üçümüz bir meclisde hazır olduğumuz hâlde havâle-i mukayyede-i sahîha-i şer‘iye ile havâle ve her birimiz havâle-i mezkûreyi kabûl ve ol vechile alacağım olan muhtâlün-aleyh merkūm es-Seyyid Mehmed’in zimmetine nakledip muhîl-i gāib-i mezbûr Eyüb’ün zimmeti berîe olmağla meblağ-ı muhtâl-i mezkûr beş yüz guruşu muhtâlün-aleyh merkūm es-Seyyid Mehmed’den bi-hükmi’l-havâle hâlâ taleb ederim deyü da‘vâ eylediğimde ol dahi kazıyye minvâl-i meşrûh üzre olduğunu ikrâr ve i‘tirâf edip lâkin meblağ-ı muhtâlün-bih-i mezkûr beş yüz guruşun iki yüz kırk guruşunu ceste ceste muhtâlün-lehâ-i mezbûre Şerife Hadîce Hatun’a edâ ve teslîm etmişdim deyü inkârıma mukārin beni def‘e tesâddî ve ol vechile beynimizde ba‘de’l-münâza‘a beynimiz ıslâh olunup ben da‘vâ-yı mezkûremden merkūm es-Seyyid Mehmed ile bi’t-tav‘ ve’r-rızâ dört yüz guruşa sulh olduğumda ol dahi sulh-ı mezkûru ba‘de’l-kabûl ben bedel-i sulh-ı merkūm dört yüz guruşdan mâ‘adâ ziyâdesine ve bi’l-cümle husûs-ı mezkûra müte‘allika da‘vâdan mezbûr es-Seyyid Mehmed ile gāib-i mezbûr Eyüb’ün zimmetini merkūm es-Seyyid Mehmed dahi def‘-i mezkûruna ve bi’l-cümle husûs-ı mezkûra müte‘allika da‘vâdan benim zimmetimi her birimiz kabûlü hâvî ibrâ ve ıskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr dört yüz guruşun bi’t-taleb müdde‘iyye-i mezbûre Şerife Hadîce Hatun’a edâsıyla merkūm es-Seyyid Mehmed ikrârı mûcibince ilzâm olunduğu İstanbul Mahkemesi’nden huzûr-ı âlîlerine i‘lâm olundu. Fî 2 min-B sene [1]242