İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 312 Hüküm no: 257 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sığır celebi İbrahim b. Abdullah’ın, sığır kasapları ile sığır sakatı bedelinden 250 guruşa sulh olduğu Sığır kassâbânı ile sığır sakatı semeninden 250 guruşa sulh Ma‘rûz Sığır celebânından Korucu oğlu İbrahim b. Abdullah nâm kimesne meclis-i şer‘-i münîrde Âsitâne-i aliyyede vâki‘ sığır kassâbânı kethudâsı el-Hâc İbrahim Ağa ve esnâfından Osman Ağa ve İsmail Ağa ve Lütfullah Ağa ve Hâşim Ağa ve sâir mazbûtü’l-esâmî ve mahsûrü’l-eşhâs kimesneler muvâcehelerinde sekene-i Dârü’s-saltanati’s-seniyyenin tevsî‘-i dâire-i ma‘âşları’çün bu def‘a Rumeli’den celb eylediğim yüz doksan iki re’s sığırımı nizâm-ı belde üzre esnâf-ı merkūmeye bey‘ ve tevzî‘ etmişdim lâkin beher derisinin kıymeti onar guruş iken sakat nâmıyla altmışar para teklîfiyle te‘addî etmeleriyle suâl olunup ber-vech-i muharrer altmışar paradan verdikleri cem‘an iki yüz seksen sekiz guruşdan ziyâde onar guruşdan tekmîline iktizâ eden bin altı yüz otuz iki guruşu esnâf-ı merkūmeden taleb ederim deyü tesâddî eylediğim da‘vâmdan bâ-tavassut-ı muslihîn esnâf-ı mahsûre-i merkūme ile bi’t-tav‘ ve’r-rızâ iki yüz elli guruş bedel-i makbûza sulh olduğumda ol dahi sulh-ı mezkûru ba‘de’l-kabûl bi’l-cümle husûs-ı mezkûra ve ziyâde mutâlebesine ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü ikrâr ve tesâdukları İstanbul Mahkemesi’nden huzûr. Fî 12 Cumâdelûlâ sene 1242