İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 312 Hüküm no: 258 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Ağa b. Süleyman’ın, Şeyhferhad mahallesindeki arsadaki hisselerini devrettiği Şeyhferhad mahallesinde arsa keşfi Ma‘rûz İşbu arzuhâle merbût diğer arzuhâl bâlâsına sâdır olan fermân-ı âlîlerine imtisâlen zikri âtî husûsun mahâllinde lede’l-mu‘âyene keşf ve tahkīki’çün savb-ı şer‘-i enverden me’zûnen irsâl olunan Kâtib Mehmed Hidâyetullah Efendi dâ‘îleri bi’l-ma‘iyye rü’yete me’mûr Haremeyn-i şerîfeyn müfettişi olup İstanbul pâyesiyle tekrîm buyrulan Emin Beyefendi-zâde fazîletlü Abdülkadir Beyefendi tarafından meb‘ûs Kâtib Mehmed Hamdi Efendi hâssa mi‘mârı hulefâsından Mustafa Seydâ ve Mehmed Tahir Halîfeler ile İstanbul’da Kumkapı kurbünde Musallâ nâm mahâlde Şeyhferhad mahallesinde vâki‘ Dârü’s-sa‘âdeti’ş-şerîfe ağası hazretleri nezâret-i aliyyelerinde âsûde evkāfdan sadr-ı esbak İbrahim Paşa Kethudâsı Mehmed Kethudâ’nın Ortaköy’de vâki‘ câmi‘-i şerîf ve mekteb ve hayrât ve sâiresi vakfı müsakkafâtından bir tarafdan ba‘zan vakf-ı mezbûrdan Terazine bt. Malhas Nasrâniye tasarrufunda olan bakkāl dükkânı ve bir tarafdan yine vakf-ı mezbûrdan doğramacı dükkânı ve bir tarafdan ba‘zan Yorganî zevcesi Zeyneb Hatun’un vakıf menzili ve etrâf-ı selâsesi tarîk-ı âm ile mahdûd ve şehriye yüz altmış akçe icâre-i müecceleli münâza‘un-fîh bir bâb arsaya varıp mahalle-i mezbûre imâmı es-Seyyid Mehmed Efendi b. Kasım ve Dîvân-ı hümâyûn kalemi küttâbından es-Seyyid Ali Bey b. es-Seyyid Lütfullah ve Esîrci es-Seyyid Ahmed Ağa b. Veliyüddin ve Tâcir Mustafa Ağa b. Hasan ve Kavukçu es-Seyyid Mehmed Ağa b. Mustafa ve Camcı el-Hâc Mustafa Ağa b. İsmail ve Ebûbekir Ağa b. Hasan nâm kimesneler huzûrlarında akd-i meclis-i şer‘-i âlî ettiklerinde arsa-i mezkûrenin bundan akdem rub‘una bâ-temessükât-ı mütevellî bi’l-icâreteyn mutasarrıfe olan Anna bt. Takfor Nasrâniye hâlike ve sadrî kebîr evlâdı olup kendi nefsinden asîl ve li-ebeveyn er-karındaşı Mağazacı Frankol v. Mardiros zimmî tarafından husûs-ı âti’l-beyânı tasdîka vekîl-i müseccel-i şer‘îsi olan şahsı mu‘arrefe Efkene Nasrâniye ile kezâlik selâse erbâ‘ına bâ-temessükât-ı mütevellî yine bi’l-icâreteyn mutasarrıfe olan kezâlik şahsı mu‘arrefe mersûme Terazine Nasrâniyeden her biri meclis-i ma‘kūd-ı mezkûrda mârrü’z-zikr arsaya el-yevm bâ-temessükât-ı mütevellî yüz altmış akçe icâre-i müeccele ile bi’l-icâreteyn mutasarrıf olan Kahveci es-Seyyid Mehmed Emin Ağa b. es-Seyyid Süleyman tarafından husûs-ı âti’l-beyânda vekîl olduğu Simkeş İbiş Ağa [51a] b. Ahmed ve Hüseyin Ağa b. Mehmed şehâdetleriyle ber-nehc-i şer‘î sâbit olan es-Seyyid el-Hâc İbrahim Ağa b. es-Seyyid Osman muvâcehesinde vakf-ı mezbûrun evlâdiyet ve meşrûtiyyet üzre mütevellîsi olan İsmail Bey b. İbrahim Bey hazır olduğu hâlde işbu derûnunda akd-i meclis-i şer‘-i âlî olunan arsa-i mahdûde-i mezkûreyi müvekkil-i mezbûr es-Seyyid Mehmed Emin Ağa bin iki yüz otuz altı senesi Şa‘bâni’l-mu‘azzamının on yedinci günü hâlike-i mersûme Anna ve mersûme Terazine Nasrâniyeleri ihâfe ederek yedlerinden bir-takrîb bin üç yüz guruş bedel-i makbûz mukābelesinde bâ-re’y-i mütevellî kerhen tefevvüz ve kabûl ettikden sonra arsa-i mahdûde-i mezkûrenin bir mikdârına müceddeden ebniye binâ ve inşâ ederek mutasarrıf olup lâkin zikrolunan mahâll-i mezkûru ke’l-evvel asîl ve müvekkil-i mersûmûna bâ-re’y-i mütevellî fâriğ olmak üzre müvekkil-i merkūm es-Seyyid Mehmed Emin Ağa’ya izâfetle vekîl-i mezbûr es-Seyyid el-Hâc İbrahim Ağa’ya tenbîh olunmak bi’l-asâle ve bi’l-vekâle murâdımızdır deyü bundan akdem da‘vâya tesâddî etmişler idi el-hâletü hâzihî muslihûn tavassutuyla sâlifü’z-zikr ebniye mahâllinden bakī kalan arsa-i âti’z-zikri bize hısas-ı mezkûrelerimize göre bi’l-vekâle fâriğ olmak üzre beynlerimiz te’lîf olunup ol vechile kâtibân-ı mezbûrân mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip ba‘de’l-inhâ ve’t-takrîr vekîl-i mezbûr es-Seyyid el-Hâc İbrahim Ağa bi’t-terâzî du‘âhâne-i dâ‘îlerinde ma‘kūd meclis-i şer‘-i münîrde sahibe-i arzuhâl mersûmetân Terazine ve Efkene Nasrâniyeler muvâcehelerinde arsa-i mahdûde-i mezkûr[e]den olarak bir tarafdan zikrolunan bakkāl dükkânı ve bir tarafdan müvekkil-i mezbûr es-Seyyid Mehmed Emin Ağa müceddeden inşâ eylediği menzili ve tarafeyni tarîk-ı âm ile mahdûd mi‘mârân-ı mezbûrân misâhalarıyla tûlen ve arzan bi-hesâb-ı terbî‘î iki yüz altmış iki zirâ‘ şehriye yüz akçe icâre-i müeccele ile olan mahâll-i mu‘ayyeni <> asîl ve müvekkil-i mersûmûna ferâğ-ı mu‘teber-i kat‘î ile bedel-i ma‘lûm ve makbûz mukābelesinde <> bi’l-vekâle hısas-ı mezkûre üzre ferâğ ve tefvîz eylediğimde <> onlar dahi bi’l-asâle ve bi’l-vekâle tefevvüz ve kabûl ve mütevellî-i mezbûr dahi tasarruflarrına bi’t-tevliye izin verip ferâğ-ı mezkûrda şurût-ı müfside müdde‘âsına ve sâire müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle kabûlü hâvî ibrâ ve ıskāt edip ol vechile arsa-i mahdûde-i mezkûrenin rub‘u asîl ve müvekkil-i mersûmân Frankol zimmî ile Efkene Nasrâniyenin ale’l-iştirâki’s-seviy ve selâse erbâ‘ı dahi mersûme Terazine Nasrâniyenin dâhil-i havza-i tasarrufları olup müvekkilim mezbûrun kat‘a alâkası kalmadığını asîl ve vekîl-i mersûmân tasdîk ve tahkīk eylediği İstanbul Mahkemesi’nden huzûr. Fî 7 B sene 1242