İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 318 Hüküm no: 263 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Mehmed’in, kahvehane zannıyla kapatılan berber dükkânının açılması için izin talebi Kahvehâne zannıyla seddolunmuş berber dükkânının küşâdı’çün izni hâvî Ma‘rûz Sâdır olan fermân-ı âlîlerine imtisâlen zikri âtî husûsun mahâllinde lede’l-mu‘âyene keşf ve tahkīki’çün cânib-i şer‘-i enverden me’zûnen irsâl olunan Kâtib es-Seyyid Ahmed Efendi dâ‘îleri ve hâssa mi‘mârı hulefâsından Derviş Ali ve Ahmed Halîfeler ile İstanbul’da Topkapı kurbünde Bâyezid Ağa mahallesinde tarîk-ı caddede keresteci sırasında bir tarafdan Turşucu Ali ve Tütüncü Kapril zimmî dükânları beynlerinde kâin mesdûd bir bâb berber dükkânına varıp berber esnâfının kethudâsı İbrahim Ağa ve Şeyh[i] el-Hâc Abdi Efendi ve Du‘âcı İsmail Efendi ve Çavuş Mustafa Efendi ve yiğitbaşı Nuri ve köşe ustası Mehmed Emin ile mahalle-i mezbûre imâmı Hâfız Mehmed Ârif Efendi ve ahâlîsinden Mehmed Said Ağa ve Salih Ağa ve Mehmed Emin Ağa ve sâir mazbûtü’l-esâmî kimesneler hazır oldukları [52a] hâlde akd-i meclis-i şer‘-i âlî ettikde zikrolunan iki kepenk bir bâb berber dükkânının bâ-temessük-i mütevellî bi’l-icâreteyn müstakillen mutasarrıfı ve derûnunda mevcûde beyne’l-esnâf gedik ta‘bîr olunur hâmiş-i arzuhâlde mastûr Başmuhâsebe derkenârı nâtık olduğu üzre Ali ismine mukayyed ve mu‘teber âlât-ı lâzıme-i ma‘lûmesinin tedâvül-i eydî ile şirâen müstakillen mâliki sahib-i arzuhâl es-Seyyid İbrahim Ağa b. es-Seyyid Mehmed nâm kimesne meclis-i ma‘kūd-ı mezkûrda takrîr-i kelâm edip bundan akdemce sâdır olan fermân-ı âlîlerine imtisâlen mecmû‘-ı kahvehâneler sedd ü bend olunduğu esnâda ber-vech-i muharrer mutasarrıf ve gediğine mâlik olduğum mukayyed ve mu‘teber taht-ı nizâma dâhil olan berber dükkânı dahi sehve mebnî kahvehâne zannıyla sedd ü bend ve ocağı hedm olunmuş olduğu beyânıyla dükkân-ı mezkûrun küşâdına izin ve ruhsat-ı seniyye-i veliyyü’n-nu‘mâneleri inâyet ve ihsân buyurulması niyâzımdır dedikde fi’l-vâki‘ dükkân-ı mezkûr derûnunda mevcûde olan gedik ve derkenârda muharrer Ali Usta ismine mukayyed ve mu‘teber ve taht-ı nizâma dâhil berber gediği olup ber-minvâl-i muharrer sehve mebnî sedd ü bend olunmuş olduğunu ve zikrolunan kahvehâne şeklinde olmayarak sâir berber dükkânı misillü mazbût olduğunu esnâf ve ahâlî-i merkūmûndan her biri alâ-tarîkı’ş-şehâde haber verdiklerini kâtib-i merkūm mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘e gelip alâ-vukū‘ihî inhâ ve takrîr etmeleriyle bu sûretde mezbûr es-Seyyid İbrahim Ağa’nın istid‘âsına müsâ‘ade-i seniyyeleri erzânî buyurulmak re’y-i rezîn-i isâbet-karîn-i âsafânelerine menût mevâddan idüğü İstanbul Mahkemesi’nden huzûr. Fî 20 B sene 1242