Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 374 Hüküm no: 426 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsak’ın Şevki Mehmed Efendi b. Muzaffer’e olan borcunu erteletmesi Tâife-i yahudun Kirü[z] cemâ‘atinden olup mahmiye-i İstanbul’da hısnı ebvâbından Balatkapısı hâricinde Karabaş mahallesinde sâkin Harunoğlu demekle şehîr İsak nâm yahudi meclis-i şer‘-i şerîf-i enverde işbu râfi‘ü’l-kitâb Şevki Mehmed Efendi b. Muzaffer mahzarında ikrâr ve takrîr-i kelâm edip mezbûr Şevki Mehmed Efendi ile târih-i kitâba gelince beynimizde nice ahz u i‘tâ ve mu‘âmelât-ı şettâ vâkı‘a olup el-hâletü hâzihî beynimizde hesâb gördüğümüzde mûmâ-ileyh Şevki Mehmed Efendi’nin benim zimmetimde dört bin beş yüz guruş hakkı zuhûr edip meblağ-ı mezbûr zimmetimde lâzımü’l-edâ deynim olmağla mukābelesinde elmas ile vaz‘ bir mücevver hançer ve kendi mührümle memhûr ma‘lûmü’l-mikdâr cevâhirimi yedine rehin vaz‘ ve teslîm ol dahi irtihân ve kabz ve deyn-i mezbûru târih-i kitâbdan beş ay tamâmına değin bi’t-taleb te’cîl eyledi fîmâ ba‘d deyn-i mezbûr ile rihân-ı merkūmeden mâ‘adâ kendi vakfından istidâne eylediğim meblağın murâbahâtına ve târih-i kitâba gelince beynimizde cereyân eden sâir ahz u i‘tâ ve mu‘âmelât-ı şettâya müte‘allika âmme-i da‘vâdan mûmâ-ileyh Şevki Mehmed Efendi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Fahrü’l-müderrisînü’l-kirâm İbrahim Efendi, Mustafa Çelebi b. eş-Şeyh Mehmed, İbrahim Efendi b. el-Hâc Receb, Mustafa Çelebi Kethüdâ-yı muhzırân, el-Hâc Mustafa b. Tevekkül.