İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 327 Hüküm no: 272 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üstüyan v. Dimitri’nin, alacaklısı Lolo v. Yani’nin kendisini Yazıcı Yani v. Kiryako’ya havale ettiği iddiasının geçersizliği 266 guruş havâle men‘i Ma‘rûz Çoban tâifesinden Üstüyan v. Dimitri zimmî meclis-i şer‘-i münîrde celeb tâifesinden sahib-i arzuhâl Yazıcı Yani v. Kiryako zimmî muvâcehesinde celeb tâifesinden gāib ani’l-meclis Lolo v. Yani zimmî târih-i i‘lâmdan beş sene mukaddem ağnamını ra‘y için beher şehr on ikişer guruş ücret tesmiyesiyle ve beher şehr onar guruş ücret tesmiyesiyle gāibûn ani’l-meclis Metri v. Yuvan ve Sutko v. Yorgi ve Delpin v. Yanako nâm üç nefer zimmîleri istîcâr ve kabûl ve her birimiz bir sene-i kâmile gāib-i mersûm Lolo zimmînin ağnamını ra‘y edip ol vechile ecr-i müsemmâ-yı mezkûrumuzdan mersûmun zimmetinde benim yüz kırk dört guruş ve gāibûn-ı mesfûrûnun dahi üç yüz altmış guruş hakkımız müctemi‘ olmağla gāibûn-ı mesfûrûn bundan akdem benim mâlımdan karz aldıkları üç yüz altmış guruş deynleri ile beni ol mikdâr medyûnları mersûm Lolo üzerine cümlemiz bir meclisde olduğumuz hâlde havâle-i mukayyede ile havâle ve her birimiz kabûl eylediğimizden sonra mersûm Lolo zimmîden ciheteyn-i mezkûreteynden bana deyni olan cem‘an beş yüz dört guruşun iki yüz otuz sekiz guruşunu bana def‘ ü teslîm ve bâkī iki yüz altmış altı guruşuyla beni mersûm Yani zimmî üzerine üçümüz bir meclisde iken havâle-i mukayyede ile havâle ve her birimiz kabûl etmemizle meblağ-ı muhâlün-bih-i merkūm iki yüz altmış altı guruşu bi-hükmi’l-havâle muhâlün-aleyh mersûm Yani zimmîden taleb ederim deyü da‘vâ ettikde ol dahi külliyen inkâr etmekle müdde‘î-i mersûm Üstüyan zimmî da‘vâ-î mezkûresini vech-i şer‘î üzre isbâta kādir olamayıp talebiyle mesfûr Yani zimmîye bi’l-muvâcehe ber-nehc-i şer‘î yemîn verilmeğin mûcibince müdde‘î-i mersûm Üstüyan zimmî da‘vâ-yı mezkûresiyle mesfûr Yani zimmîye bilâ-beyyine mu‘ârazadan men‘ olunduğu İstanbul Mahkemesi’nden huzûr. Fî 27 min-Recebi’l-ferd sene 1242