İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 328 Hüküm no: 273 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Davud’un, alacaklısı Mehmed b. Süleyman ile 2500 guruşa sulh olduğu 2500 guruşa sulh Ma‘rûz Sahib-i arzuhâl Niğdeli Emir Hasan torunu es-Seyyid Mehmed b. Davud nâm kimesne meclis-i şer‘-i enverde Bât Pazarı’nda Dellâl Niğdeli Frenkli oğlu diğer es-Seyyid Mehmed b. es-Seyyid el-Hâc Süleyman nâm kimesne muvâcehesinde mezbûr diğer es-Seyyid Mehmed zimmetinde işbu târihden üç sene mukaddem mâlımdan karz aldığı beş bin beş yüz guruş alacak hakkım olmağla taleb ederim deyü da‘vâ eylediğimde ol dahi cevâbında târih-i mezkûrda senden ancak iki bin beş yüz guruş karz alıp üzerine dahi bilâ-devr murâbaha nâmıyla üç bin guruş zam olunarak beş bin beş yüz guruşa iblâğ olunmağla ol vechile meblağ-ı mezkûrun ber-vech-i muharrer ancak iki bin beş yüz guruş deyn-i sahîhim olup mâ‘adâsı bilâ-devr zamm-ı ribâ olduğundan mâ‘adâ işbu yedimde olan defter-i müfredât nâtık olduğu üzre târih-i mezkûrdan bu âna kadar ceste ceste sana üç bin altı yüz otuz yedi guruş teslîm etmemle bu sûretde teslîm olunan meblağ-ı merkūm üç bin altı yüz otuz yedi guruşun iki bin beş yüz guruşunu deyn-i sahîhim olan meblağ-ı merkūm iki bin beş yüz guruşa takāssan hat ve tenzîl olunup ziyâde murâbaha nâmıyla geçmişim olan bin yüz otuz yedi guruşu senden istirdâd ederim deyü inkârıma mukārin benden iddi‘â ve ol vechile beynimizde ba‘de vukū‘ı’l-münâza‘a beynimiz ıslâh ve te’lîf olunup ben ber-vech-i muharrer tesâddî eylediğim beş bin beş yüz guruş müdde‘âmdan merkūm diğer es-Seyyid Mehmed ile bi’t-tav‘ ve’r-rızâ iki bin beş yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūmdan mâ‘adâya ve bi’l-cümle husûs-ı mezkûra ve sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı merkūm iki bin beş yüz guruşun bi’t-taleb müdde‘î-i mezbûr es-Seyyid Mehmed’e edâsıyla merkūm diğer es-Seyyid Mehmed ilzâm olunduğu İstanbul Mahkemesi’nden huzûr. Fî 16 Ca sene 1242