İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 333 Hüküm no: 280 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miraç Kandili gecesinde camilerin minarelerindeki kandillerin yakılmasına dair hüküm İ‘lâm-ı Şeb-i Mi‘râc-ı Hazreti Rasûl-i Ekrem Efendimiz -sallallâhu aleyhi ve alâ-âlihî ve ashâbihî- Bâ-sahh İstanbul Kādısı Fazîletlü Efendi İşbu i‘lâmınız atebe-i ulyâ-yı mülûkâneye arz olundukda leyle-i mübâreke-i mezkûrede îkād-ı kanâdîl olunmak için kayyûmbaşılara tenbîh oluna deyü hatt-ı şerîf-i mülûkâne şeref-yâfte-i sudûr olmağla mantûk-ı münîfini icrâ eyleyesin deyü buyruldu. Fî 26 B sene 1242 Atebe-i aliyye-i gerdûn-cenâb ve südde-i sidre-sây-ı nusret-nisâb türâbına ma‘rûz-ı abd-i inâyet-yâb oldur ki İşbu sâl-i huceste-fâl-i Recebi’l-müreccebi gurresi bi’r-rü’ye yevmü’l-İsneynden mazbûta olup henüz rü’yet-i hilâle dâir şuhûd zuhûr etmemekle bu sûretde şehr-i mezkûrun yirmi yedinci Sebt gecesi mazhar-ı esrâr-ı sübhânellezî esrâ ve mehbıt-ı envâr-ı in hüve illâ vahyün yûhâ e‘nî bihî Muhammedü’l-Mustafâ -sallallâhu te‘âlâ aleyhi ve alâ-âlihî ve ashâbihî- mâ-tele’lü’l-envâr-ı fi’s-semâ Efendimiz Hazretlerinin şeb-i Mi‘râc-ı bâhirü’l-ibtihâcları olmağla deydene-i kadîme-i Devlet-i aliyye -dâmet mansûretihî ve müeyyedeti bi-eltâfi’r-rabbâniyye- üzre leyle-i mübâreke-i merkūmede kāmet-i bâlâ-yı minârât tezyîn-i kanâdîl ile tûbâ-âyât kılınmak bâbında fermân-ı celîlü’ş-şân sudûru iktizâ eylediği İstanbul Mahkemesi’nden dergâh-ı âlem-penâhlarına i‘lâm olundu. El-emr li-veliyyü’l-emr fi’l-yevmi’s-sâlis ve’l-işrîn mine’ş-şehri’l-merkūm li-seneti isneteyn ve erba‘în ve mieteyn ve elf.