İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 333 Hüküm no: 281 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ahmed’in kahvehane zannıyla kapatılan berber dükkânının tekrar açılması için izin talebi Berber dükkânı keşfi Ma‘rûz Sâdır olan fermân-ı âlîlerine imtisâlen zikri câ’î husûsun mahâllinde lede’l-mu‘âyene keşf ve tahkīki’çün cânib-i şer‘-i mutahhardan me’zûnen irsâl olunan Kâtib Hasan Şükrü Efendi dâ‘îleri [ve] hâssa mi‘mârı hulefâsından Derviş Ahmed ve Mehmed Necib Halîfeler ile İstanbul’da Kırkçeşme kurbünde Koğacılar nâm mahâlde Firuzağa mahallesinde koğacı ve kürekçi dükkânları beynlerinde kâin bir bâb berber dükkânına varıp berber esnâfının kethudâ vekîli İbrahim Ağa ve şeyhi el-Hâc Abdi Efendi ve yiğitbaşısı es-Seyyid Mehmed Nuri Ağa ve du‘âcısı İsmail Efendi ve çavuşu Molla Mustafa ve çavuş yamağı es-Seyyid el-Hâc Molla Abdurrahman ve mahâlle-i mezbûre ahâlîsinden Koğacı Abdullah Efendi b. Salih ve Koğacı Hasan Ağa b. Mustafa ve Koğacı Abdullah Ağa b. Veliyüddin ve Koğacı Mustafa Ağa b. İbrahim ve Müezzin es-Seyyid Abdullah Efendi b. es-Seyyid Halil nâm kimesneler ve sâirleri hazır oldukları hâlde akd-i meclis-i şer‘-i âlî ettikde zikrolunan berber dükkânı derûnunda mevcûde beyne’l-esnâf gedik ta‘bîr olunur diğer arzuhâl hâmişinde mastûr Başmuhâsebe derkenârı nâtık olduğu üzre Ârif Usta ismine mukayyed ve mu‘teber âlât-ı lâzıme-i ma‘lûmenin tedâvül-i eydî ile müstakilleten mâlikesi sahibe-i arzuhâl Emine bt. Ahmed nâm hatunun zevci ve tarafından husûs-ı âtîde vekîl olduğu Enderûn-ı sadr-ı âlî a[g]avâtından Hocapaşalı Hasan Ağa b. Mahmud ve el-Hâc Veliyüddin Ağa [b.] İbrahim nâm kimesneler şehâdetleriyle sâbit olan Enderûn-ı sadr-ı âlî agavâtından Hüseyin Ağa b. İsmail nâm kimesneler meclis-i ma‘kūd-ı mezkûrda takrîr-i kelâm edip bundan akdem sâdır olan fermân-ı âlîye imtisâlen mecmû‘-ı kahvehâneler sedd ü bend olunduğu esnâda zevcem müvekkilem mezbûrenin dahi ber-vech-i muharrer gediğine mâlike olduğu mukayyed ve mu‘teber ve taht-ı nizâma dâhil olan berber dükkânı dahi sehve mebnî kahvehâne zannıyla sedd ü bend ve ocağı hedm olunmuş olmağla dükkân-ı mezkûrun küşâdına izin ve ruhsat-ı seniyye-i veliyyü’n-nu‘mâneleri inâyet ve ihsân buyurulması zevcem müvekkilem mezbûrenin niyâzıdır dedikde fi’l-vâki‘ dükkân-ı mezkûr derûnunda mevcûd olan gedik ve derkenâr-ı mezkûrda muharrer Ârif Usta ismine mukayyed ve mu‘teber ve taht-ı nizâma dâhil olan berber gediği olup ber-minvâl-i muharrer sehve mebnî sedd ü bend olunmuş olduğunu esnâf ve ahâlî-i mezbûrûndan her biri alâ-tarîkı’ş-şehâde haber verdiklerini ve zikrolunan berber dükkânı terbî‘an yirmi altı buçuk zirâ‘ olup kebîr kahvehâne şeklinde olmayarak sâir berber dükkânları misillü olduğunu mi‘mârân-ı mezbûrân inhâ <> eylediklerini kâtib-i merkūm dâ‘îleri mahâllinde ketb ve tahrîr ve ma‘an mürsel ümenâ-i şer‘le meclis-i şer‘a gelip mi‘mârân ve vekîl ve esnâf ve ahâlî-i merkūmûn bi-ecmâ‘ihim hazır oldukları hâlde tasdîklerine mukārin alâ-vukū‘ihî takrîr etmeleriyle bu sûretde müvekkile-i mezbûre Emine Hatun’un istid‘âsına müsâ‘ade-i seniyyeleri erzânî buyurulmak re’y-i rezîn-i isâbet-karîn-i âsafânelerine menût mevâddan idüğü İstanbul Mahkemesi’nden huzûr. Fî 3 Ş sene 1242