İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 336 Hüküm no: 283 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostandi v. Zahraki’nin, ev tamiri bedelinden Fâtıma bt. Abdullah ile 500 guruşa sulh olduğu Menzil keşfi ve ta‘mîr masrafından 500 guruşa sulh Ma‘rûz Sâdır olan fermân-ı âlî-şâna imtisâlen zikri câ’î husûsun mahâllinde ketb ve tahrîri’çün cânib-i şer‘-i nebevîden me’zûnen irsâl olunan Kâtib Hasan Şükrü Efendi dâ‘îleri [ve] hâssa mi‘mârı hulefâsından es-Seyyid Mehmed Râşid ve İsmail Halîfeler ile İstanbul’da Bâb-ı Âsafî kurbünde Lala Hayreddîn mahallesinde Şengül Hamamı karşısında vâki‘ Hallâcbaşı zevcesi demekle arîfe Fâtıma bt. Abdullah nâm hatunun mutasarrıfe olduğu bir bâb menzile varıp huzûr-ı Müslimînde akd-i meclis-i şer‘-i âlî ettikde arzuhâlde isimleri mezkûr kendi nefsinden asîl ve şerîki olup neccâr tâifesinin İstanbul kolu neferâtından Bakkal karyeli Kostandi v. Deli Nikola zimmî tarafından husûs-ı âtîde vekîl olduğu es-Seyyid Ebûbekir b. Mustafa ve Karahisârî el-Hâc Ahmed b. Hüseyin nâm kimesneler şehâdetleriyle ber-nehc-i şer‘î sâbit olan diğer Kostandi v. Zahraki nâm zimmî meclis-i ma‘kūd-ı mezkûrda sahibe-i arzuhâl mezbûre Fâtıma Hatun muvâcehesinde biz bundan akdem mezbûre Fâtıma Hatun’un bi-şartı’r-rücû‘ emriyle muhterik arsa üzerine müşterek mâlımızdan üç bin iki yüz guruş sarfla menzil-i mezkûru müceddeden binâ ve inşâ ve ba‘zı noksanıyla terk etmemizle ol vechile menzil-i mezkûrun heyet-i mevcûdesine mâlımızdan masrûfumuz olup mezbûrun zimmetinde bi’l-mürâca‘a alacak hakkımız olan meblağ-ı mezkûr üç bin iki yüz guruşun bin sekiz yüz yetmiş sekiz guruşunu mukaddemâ ceste ceste bize edâ ve teslîm biz dahi yedinden ahz ü kabz etmemizle bâkīsi olan bin üç yüz yirmi iki guruşu mezbûre Fâtıma Hatun’dan bi’l-asâle ve bi’l-vekâle hâlâ taleb ederim deyü tesâddî eylediğim da‘vâmdan bâ-vesâtat-ı muslihîn mezbûre Fâtıma Hatun ile bi’t-tav‘ ve’r-rızâ beş yüz guruş üzerine bi’l-asâle ve müvekkilim mersûma izâfetle bi’l-vekâle sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ sekiz yüz yirmi iki guruşa ve bi’l-cümle husûs-ı mezkûra ve sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve ıskāt ve her birimiz ber-vech-i muharrer âharın asâleten ve vekâleten ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı merkūm beş yüz guruşun yüz guruşunu işbu meclis-i ma‘kūd-ı mezkûrda bana edâ ve teslîm ben dahi <> yedinden bi’l-asâle ve bi’l-vekâle ahz ü kabz etmemle bakīsi olan dört yüz guruşu mezbûre Fâtıma Hatun’un hâlâ ve def‘aten bize edâya iktidârı olmayıp ber-vech-i âtî tecîl ve taksîte tâlibe olduğunda ben dahi meblağ-ı bâkī-i mezkûr dört yüz guruşun iki yüz guruşunu işbu târih-i i‘lâm şehri gāyetinde ve iki yüz guruşunu dahi şehr-i âtî Şa‘bâni’l-mu‘azzamının on beşinci günü bana edâ ve îfâ etmek üzre rızâmla mezbûre Fâtıma Hatun’u bi’l-asâle ve bi’l-vekâle tecîl ve taksît eyledim dediğini mezbûre Fâtıma Hatun tasdîk ve ecl-i mezkûru kabûl ve meblağ-ı bâkī-i mezkûr dört yüz guruşu ber-vech-i muharrer müeccelen ve mukāssatan dâyin-i asîl ve vekîl-i mersûma tamamen edâ ve îfâya ta‘ahhüd eylediğini kâtib-i merkūm dâ‘îleri mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip tarafeyn hazır oldukları hâlde tasdîklerine mukārin alâ-vukū‘ihî inhâ ve takrîr eylediği ba‘de’t-tenfîz İstanbul Mahkemesi’nden huzûr. Fî 12 B sene 1242 Nüshateyn [Beyaz Beyaz]