İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 338 Hüküm no: 284 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürk ve kumaş bedeli 6881 guruşun Samuyel v. Yasef’den tahsil edilip, kürkçü esnafından Yorgi, Serope ve Avanes’e teslim edileceği 6881 guruş hüküm Ma‘rûz Âsitâne-i aliyyede vâki‘ kürkçü esnâfından olup envâ‘-ı kürk esmânından ba‘de külli’l-hesâb sahhu’l-bâkī iki bin dokuz yüz elli iki guruş iddi‘â eden Dimitri v. Yorgi ve kezâlik kürk <> esmânından bâkī iki bin yedi yüz on sekiz guruş iddi‘â eden Serope v. Miledos envâ‘-ı çetârî ve gezi esmânından bâkī bin doksan bir guruş ve bir hazînekârî hilyeli çetârî semeninden dahi yüz yirmi guruş iddi‘â ve hasmı dahi zikrolunan çetârîyi bana hîbe ve teslîm etmişdi deyip ba‘dehû hîbe da‘vâsından fâriğ olarak iştirâsını ikrâr ve tasdîk etmekle ol vechile dahi meblağ-ı merkūm yüz yirmi guruş ki cem‘an bin iki yüz on bir guruş iddi‘â eden Bezzâz Avanes v. Andon zimmîler Çarşamba günü Arz Odası’nda huzûr-ı lâmi‘u’n-nûr-ı sadâret-penâhîlerinde ma‘kūd meclis-i şer‘-i münîrde arzuhâlde mezkûru’l-ism Mahmud Paşa Çarşısı’nda Attar Samuyel v. Yasef Yahûdî muvâcehesinde mersûm Samuyel Yahûdî zimmetinde bundan akdem yedimizden ve mâlımızdan iştirâ ve kabz eylediği semmûr ve sincab ve vaşak ve nâfe ve teyyün ve sâir envâ‘-ı kürk ve çetârî ve gezi ve sâir envâ‘-ı kumaş semenlerinden ba‘de külli’l-hesâb sahhu’l-bâkī cem‘an altı bin sekiz yüz seksen bir guruş alacak hakkımız olmağla meblağ-ı bâkī-i merkūm altı bin sekiz yüz seksen bir guruşu mersûm Samuyel Yahûdiden hâlâ taleb ederiz deyü da‘vâ ettiklerinde ol dahi cevâbında kazıyye minvâl-i muharrer üzre olduğunu ikrâr ve i‘tirâf edip lâkin ben maktûl Şapçı Yahûdinin maslahat-güzârı olduğumdan mersûmûndan ol makūle kürk ve kumaş şirâsına beni irsâl etmekle ben dahi akd-i bey‘i mersûm Behor Yahûdiye izâfet etmeksizin kendi nefsime izâfetle mersûmûndan iştirâ ve gayrı-ez teslîmât sahhu’l-bâkī ol mikdâr guruş kalmışdı ancak ben eşyâ-i mezkûreyi mücerred hâlik-i mersûm Behor Yahûdî için iştirâ etmiş olmamla öyle olıcak semen-i bâkī-i mezkûru terekesinden alsın deyü takrîr-i meşrûhu üzre tesâddî eylediği da‘vâsında akd-i bey‘i hâlik-i mersûm Behor Yahûdiye izâfet etmeksizin kendi nefsine izâfetle iştirâ eylediğini mukır ve mu‘terif iken <> îrâd eylediği kelâmı ref‘e sâlih cevâb-ı şer‘î olmadığı mersûm Samuyel Yahûdiye tefhîm olunmağın bu sûretde meblağ-ı mecmû‘-ı merkūm altı bin sekiz yüz seksen bir guruş mersûm Samuyel Yahûdiden tahsîl ve mesfûrûn Yorgi ve Serope ve Avanes zimmîlere bâlâda tafsîl olunduğu üzre teslîm olunmak iktizâ eylediği İstanbul Mahkemesi’nden huzûr. Fî 9 min-Şa‘bâni’l-mu‘azzam sene 1242