İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 341 Hüküm no: 289 Orijinal metin no: [56a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Abdullah’ın, yarısına tasarruf ettiği tütüncü gediğini ortağı Kukas v. Atam’a sattığı Tütüncü mübâya‘ası ve semenini edâya ta‘ahhüd Ma‘rûz Sahibe-i arzuhâl mu‘arrefetü’z-zât Âişe Hanım bt. Ahmed meclis-i şer‘-i münîrde tütüncü esnâfından derûn-ı arzuhâlde ismi mezkûr Kukas v. Atam zimmî muvâcehesinde esnâf-ı merkūme kethudâsı Osman Ağa ve vekîli es-Seyyid el-Hâc Mustafa Ağa ve yazıcısı es-Seyyid Mehmed Nuri Efendi ve yiğitbaşısı Molla Osman ve sâirleri ile mersûm Kukas zimmînin li-ebeveyn er karındaşı Ohannes zimmî hazır oldukları hâlde takrîr-i kelâm edip hâmiş-i arzuhâlde mastûr ma‘den kaleminden muhrec sûret ve İstanbul Mahkemesi sicillinden muhrec hüccet kayıdları nâtık olduğu üzre İstanbul’da Mahmud Paşa Çarşısı başında Yıldız Hânı tahtında bezci dükkânı ittisâlinde kâin kalem-i mezbûrda Mustafa Ağa ismine mukayyed ve taht-ı nizâma dâhil ve mu‘teber bir bâb kârgir tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf-ı şâyi‘-i hâzır-ı mersûm Ohannes zimmîden müşterâ benim ve nısf-ı şâyi‘-i âharı dahi mersûm Kukas zimmînin tedâvül-i eydî ile bâ-hüccet-i şer‘iye iştirâken ve şayi‘an yedimizde emvâlimiz olmağla hâlâ ben ber-vech-i muharrer mâlike olduğum nısf hisse-i şâyi‘a-i mezkûremi tarafeynden bi’l-îcâb ve’l-kabûl bâtten ve sahîhan bi-safkatin vâhidetin şerîkim mersûm Kukas zimmîye iki bin guruşa bey‘ ve temlîk ve vech-i lâyıkı üzre teslîm ve dükkân-ı mezkûra mersûmun hissesinde bi-şartı’r-rücû‘ emriyle mâlımdan masrûfum olan altı yüz yetmiş guruş müdde‘âmdan dahi bi’t-tav‘ ve’r-rızâ beş yüz guruş üzerine sulh olduğumda ol dahi ber-vech-i muharrer iştirâ ve temellük ve tesellüm ve sulh-ı mezkûru dahi kabûl etmekle semen ve bedel-i mezkûrdan mâ‘adâ bey‘-ı mezkûrun tağrîr ve gabnine ve ziyâde masrûf müdde‘âsına ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âm ile kabûlü hâvî ibrâ ve ıskāt eyledik deyü mukırre-i mezbûre Âişe Hanım’ın bi’l-cümle takrîr-i meşrûhunu mersûm Kukas zimmî tasdîk ve semen ve bedel cem‘an iki bin beş yüz guruş zimmetinde mezbûre Âişe Hanım’a sahîhan deyni olduğunu ikrâr ve i‘tirâf ve çend-rûz zarfında edâya ta‘ahhüd eylediği İstanbul Mahkemesi’nden huzûr. Fî 7 Ş sene 1242