İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 342 Hüküm no: 290 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kokona bt. Yorgi’nin, evinin arkasındaki Sultan Süleyman Vakfı’na ait arsayı zabtetmek istediği Cibali dâhilinde Seferikoz mahallesinde keşf Ma‘rûz Sâdır olan fermân-ı âlîlerine imtisâlen zikri âtî husûsu evvel-emirde mahâllinde keşf ve mu‘âyene ve tahkīk için cânib-i şer‘-i kavîmden me’zûnen irsâl olunan Kâtib Mehmed Hidâyetullah Efendi dâ‘îleri bi’l-ma‘iyye rü’yete me’mûrlar nezâret-i hazret-i sadâret-penâhîlerinde âsûde evkāf müfettişi mevâlî-i ızâmdan fazîletlü es-Seyyid Ahmed Efendi tarafından meb‘ûs Kâtib es-Seyyid Abdürrahîm Hilmi Efendi ve nezâret-i hazret-i şeyhülislâm-ı sellemehü’s-selâmîde âsûde evkāf müfettişi müderrisîn-i kirâm-ı zevi’l-ihtirâmdan Meşreb Efendi hafîdi fazîletlü Mehmed Ârif Efendi tarafından mürsel Kâtib İmâmzâde Ali Rıza Efendi hâssa mi‘mârı hulefâsından İsmail Kemâlî ve Ahmed Halîfeler ile İstanbul hısnı ebvâbından Cibali kapısı hâricinde Seferikoz mahallesinde vâki‘ zikri âtî münâza‘un-fîh olan menzil arsasına varıp huzûr-ı Müslimînde akd-i meclis-i şer‘-i âlî ettiklerinde hâmiş-i arzuhâlde mastûr <> defter-i vakfdan muhrec derkenâr nâtık olduğu üzre nezâret-i hazret-i fetvâ-penâhîde âsûde evkāfdan merhûm Kemânkeş Kara Mustafa Paşa Vakfı müsakkafâtından bir bâb menzile bâ-temessük-i mütevellî bi’l-icâreteyn mutasarrıfe olan sahibe-i arzuhâl şahsı mu‘arrefe Kokona bt. Yorgi Nasrâniye meclis-i ma‘kūd-ı mezkûrda menzil-i mezkûra muttasıl nezâret-i hazret-i sadrıazâmîde âsûde evkāfdan merhûm ve mağfûrun-leh Sultân Süleyman Han -tâbe serâhu- hazretleri<> evkāf-ı celîleleri müsakkafâtından münhedim Yahûdhâne arsasına bâ-temessük-i mütevellî bi’l-icâreteyn mutasarrıf olan Sarrâf Kanurta v. Çelbon Yahûdinin oğlu ve tarafından husûs-ı âtîde vekîl olduğu Mehmed Ağa b. Ömer ve Halil Ağa b. Salih nâm kimesneler şehâdetleriyle sâbit olan Nesim Yahûdî muvâcehesinde müşârün-ileyh Sultân Süleyman Han Hazretleri Vakfı’nın kāimmakām-ı mütevellîsi hâcegân-ı Dîvân-ı hümâyûndan hâzin-i hazret-i sadâret-penâhî izzetlü Halil Beyefendi tarafından mürsel vekîli câbî-i vakf Mehmed Râif Efendi b. Ali ve müşârün-ileyh Mustafa Paşa Vakfı mütevellîsi es-Seyyid Mehmed Şâkir Efendi tarafından mürsel vekîli kâtib-i vakf Ahmed Nebîh Efendi b. Ali hazır oldukları hâlde müvekkil-i mersûm Kanurta Yahûdî’nin yedinde olup meclis-i şer‘de kırâet olunan bin iki yüz otuz dokuz senesi Zilhicceti’ş-şerîfesinin yirmi üçüncü günü târihiyle müverrah ve ol târihde nezâret-i fetvâ-penâhîde âsûde evkāf müfettişi bulunan müderrisîn-i kirâmdan el-Hâc Ali Efendi ve nezâret-i sadâret-penâhîde âsûde evkāf müfettişi bulunan müderrisîn-i kirâmdan Hâfız Ahmed Efendi’nin hatmleriyle mahtûm bir kıt‘a i‘lâm-ı şer‘î mantûkunca derûnunda akd-i meclis-i şer‘-i âlî olunup müvekkil-i mersûm Kanurta Yahûdinin vâzı‘u’l-yed olduğu bir tarafdan cidâr-ı hısn ve iki tarafdan tasarrufumda olan menzil ve bir tarafdan müvekkil-i mersûm Kanurta Yahûdî tasarrufunda olan arsa ile mahdûd mi‘mârân-ı mezbûrân misâhalarıyla tûlen altı zirâ‘ ve arzan dört zirâ‘ on sekiz parmak bi-hesâb-ı terbî‘î yirmi altı zirâ‘ altı parmak mahâl elli seneden mütecâviz müddetde müşârün-ileyh Sultân Süleyman Han Hazretleri Vakfı’ndan olarak müvekkil-i mersûm Kanurta Yahûdinin tasarrufunda olduğunu ikrâr ederek mücerred menzilim arkasında olduğuna binâen keff-i yed-birle müşârün-ileyh Mustafa Paşa Vakfı’ndan olmak üzre bana teslîmini târih-i mezkûrda müfettiş-i mûmâ-ileyhimâ taraflarından mahâlline irsâl olunan Kâtib Hasan Hasbî Efendi ve kâtib-i merkūm Ali Rıza Efendi ve hulefâ-i mi‘mâriye ve mütevellî vekîli merkūmân huzûrlarında da‘vâ eylediğimde takrîr-i meşrûhum üzre tesâddî eylediğim da‘vâm meşrû‘â olmadığından mâ‘adâ münâza‘un-fîh olan mahâll-i mezkûr kadîmden beri müşârün-ileyh Sultân Süleyman Han Hazretleri Vakfı’ndan olup bi’l-muvâcehe bilâ-nizâ‘ zabt ve tasarruf olunageldiğini iki nefer şâhideyn-i mu‘addileyn alâ-tarîkı’ş-şehâde ihbâr etmeleriyle mûcibince mevlânâ-yı mûmâ-ileyhimâ beni bî-vech-i şer‘î mu‘ârazadan men‘ ve müfettiş-i mûmâ-ileyhimâ dahi mahâll-i mezkûru müşârün-ileyh Sultân Süleyman Han Hazretleri Vakfı’ndan olarak mersûm Kanurta Yahûdinin zabt ve tasarufu iktizâ eylediğini i‘lâm etmişler ise de mahâll-i mezkûr mücerred menzilim arkasında olduğundan da‘vâ-yı evvelim vechi üzre müşârün-ileyh Mustafa Paşa Vakfı’ndan olarak ben zabtederim deyü mazmûn-ı i‘lâm-ı mezkûru bi-tamamihî ikrâr ve tasdîk ederek tekrar da‘vâ edip lâkin ibtidâ mahâll-i mezkûr müşârün-ileyh Mustafa Paşa Vakfı’ndan olduğunu mütevellî vekîli merkūm da‘vâ etmeyip mersûme Kokona Nasrâniyeyi tekzîb eylediğini ketebe-i mûmâ-ileyhim mahâllinde ba‘de’l-keşf ve’l-mu‘âyene ketb ü tahrîr ve ma‘an-meb‘ûs ümenâ-i şer‘le meclis-i şer‘a inhâ ettiklerinden sonra imtisâlen li’l-emri’l-âlî tarafeyn Çarşamba günü Arz Odası’nda huzûr-ı fâizü’n-nûr-ı vekâlet-penâhîlerinde müfettiş-i mûmâ-ileyhimâ ile bi’l-ma‘iyye akd olunan meclis-i şer‘-i münîrde lede’l-muvâcehe [56b] ve’l-istintâk evvelen ber-muktezâ-yı şerî‘at-ı garrâ da‘vâ-yı vakfiyet mütevellîden sudûra muhtâc olup müste’cir kādir olamadığını ve sâniyen bir def‘a şer‘le rü’yet ve fasl u hasm olunan da‘vânın tekrar istimâ‘ı câiz olmadığı -sahh sahh- mersûme Kokona Nasrâniyeye tefhîm olunduğu İstanbul Mahkemesi’nden huzûr-ı âlîlerine i‘lâm olundu. Fî-gurreti Recebi’l-ferd sene 1242