İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 345 Hüküm no: 292 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangında zarar gören Çarşı-yı Kebir Gelinci Çarşısı tamir masrafının, esnafı arasında paylaşıldığı Çarşıda fesçi esnâfı kapamacı esnâfının dükkânlarına emrleriyle masrûfları olan mebâliğden bâkī 2416 guruş 132 akçe hüküm Ma‘rûz Fesçi esnâfının Bâb-ı Âlî’ye takdîm eyledikleri işbu bir kıt‘a arzuhâlleri bâlâsına bu dâ‘îleriyle Haremeyn-i şerîfeyn müfettişi fazîletlü efendi ve mi‘mâr ağa bendelerine hitâben sâdır olan fermân-ı âlîlerine imtisâlen esnâf-ı merkūmeden Mehmed b. Kasım Ebû İshak ve Ahmed b. Salih b. Yunus ve Mehmed b. Süleyman Dengîr nâm kimesneler bi’l-ma‘iyye rü’yete me’mûr Haremeyn-i şerîfeyn müfettişi olup İstanbul pâyesiyle tekrîm buyrulan zâde-i Emin Paşazâde fazîletlü mîr Abdülkadir Efendi tarafından meb‘ûs Kâtib Mehmed Es‘ad Efendi hazır olduğu hâlde meclis-i şer‘-i münîrde İstanbul’da Çarşı-yı Kebîr’de Du‘â Meydânı civârında Gelincik Çarşısı demekle meşhûr dört aded sûklarda vâki‘ kapamacı esnâfından Setrak v. Andon ve Uncu oğlu Karabet v. Kalos ve Saka oğlu Artin v. Toma ve Serap v. Hamparsom ve Serope v. Ohannes ve Manil v. Serope nâm zimmîler ile sâir bi’l-cümle kapamacı esnâfı ustaları muvâcehelerinde fesçi esnâfından Süleyman b. Osman b. Ahkaz ve el-Hâc Abdurrahman b. Mehmed Sebî ve sâir bi’l-cümle fesçi esnâfıyla Sarrâf Kapril v. Bogos ve hazır çuka esvâbcı Panayot v. Dimitri zimmîler hazır oldukları hâlde bundan akdem sudûr eden emr-i âlî-şâna imtisâlen bi-kazâillâhi te‘âlâ vukū‘ bulan harîkde muhterik olan gerek fesçi ve gerek hazır çukacı ve sarrâf ve kapamacı dükkânları ve Du‘â Meydânı sûkuyla kapamacıların dört aded zukākları kemerleri ba‘zan ta‘mîr ve ba‘zan tecdîd olunarak tekmîl olunmuş olup ancak biz mârrü’z-zikr dört aded sûkların köşelerinde kâin fesçi ve çukacı ve sarrâf ve kapamacı dükkânları -sahh sahh- gedikleri ashâbının hisselerinde bi-şartı’r-rücû‘ emrleriyle eylediğimiz mesârifden hisselerini mutâlebe ve sâdır olan fermân-ı âlî-şâna imtisâlen kıbel-i şer‘den baş kâtib mevlânâ İbrahim Ârif Efendi ve müfettiş-i mûmâ-ileyh tarafından Kâtib es-Seyyid İbrahim Efendi hâssa mi‘mârı hulefâsından Ahmed Mümtaz ve Mehmed Râşid Halîfe[ler] ile mahâll-i mezkûra varıp ihtisâb ağası adamı Muslihiddin Ağa ve sâir Müslimîn huzûrlarında keşf ve misâha ve vaz‘-ı fiyât olunarak mi‘mâr-ı mûmâ-ileyhin mumzâ defteri mantûkunca mahâll-i mezkûra masrûfumuz ancak üç bin sekiz yüz altmış üç guruş <> elli yedi akçeye resîde olup meblağ-ı mezkûrdan bin altı buçuk guruş üç buçuk akçe fesçi esnâfının tarafında olan dekâkîn gedikleri mâliklerine ve bin yedi yüz yetmiş üç guruş on üç buçuk akçe kapamacı esnâfının tarafında olan dekâkîn gedikleri mâliklerine isâbet edip mâ‘adâ bin seksen üç buçuk guruşun altmış guruşunu içimizden mezbûr Ahmed b. Salih b. Yunus’un İstanbul kādıları fazîletlü efendiler nezâretlerinde olan evkāfdan Kürkçübaşı Ahmed Şemseddin Vakfı müsakkafâtından gediğine mâlik olduğu dükkânı’çün hissesine ve yüz otuz dört guruş yirmi akçesi merkūm Mehmed b. Kasım Ebû İshak’ın vekîli olduğu müteveffâ Fesçi el-Hâc Şaban b. Ömer Taravnî kerîmesi Hafize Hatun’un Dârü’s-sa‘âdeti’ş-şerîfe ağası hazretleri nezâretlerinde olan evkāfdan Ayasofya-i Kebîr Vakfı müsakkafâtından gediğine mâlike olduğu dükkânı’çün hissesine ve altmış guruşu hâzır-ı mezbûr Fesçi el-Hâc Abdurrahman’ın mezbûr Kürkçübaşı Ahmed Şemseddin Vakfı müstagallâtından gediğine mâlik olduğu dükkânı’çün hissesine ve seksen dokuz guruş yirmi akçesi sarrâf hâzır-ı mersûm Kapril zimmînin merkūm Kürkçübaşı Ahmed Şemseddin Vakfı müstagallâtından gediğine mâlik olduğu dükkânı’çün hissesine ve doksan yedi guruş yirmi akçesi hâzır-ı mersûm Esvâbcı Panayot zimmînin yine İstanbul kādıları fazîletlü efendiler nezâretlerinde olan evkāfdan Debbağzâde el-Hâc Hasan Vakfı müsakkafâtından gediğine mâlik olduğu dükkânı’çün hissesine isâbet edip onlar dahi ikrâr ve tasdîk ve çend-rûz zarfında bize edâ ve teslîme müte‘ahhidler olmalarıyla bakī kalan altı yüz kırk üç guruşun yüz otuz dört guruş yirmi akçesi mersûm Setrak zimmîni mârrü’z-zikr Ayasofya-i Kebîr Vakfı müstagallâtından gediğine mâlik olduğu dükkânı’çün hissesine ve yetmiş iki buçuk guruşu mersûm Uncu oğlu Karabet zimmînin mezbûr Kürkçübaşı Ahmed Şemseddin Vakfı müsakkafâtından gediğine mâlik olduğu dükkânı’çün hissesine ve iki yüz altmış iki buçuk guruşu mersûm Saka oğlu Artin zimmînin merkūm Kürkçübaşı Ahmed Şemseddin Vakfı müsakkafâtından gediğine mâlik olduğu dükkânı’çün hissesine ve on altı buçuk guruş yirmi akçesi mersûm Serap zimmînin gediğine mâlik olduğu dükkânı’çün hissesine ve doksan yedi guruş yirmi akçesi mersûm Serope zimmînin mezbûr Debbağzâde el-Hâc Hasan Vakfı müstagallâtından gediğine mâlik olduğu dükkânı’çün hissesine ve altmış guruşu mersûm Manil zimmînin merkūm Kürkçübaşı Ahmed Şemseddin Vakfı müsakkafâtından gediğine mâlik olduğu dükkânı’çün hissesine isâbet etmeğin bu sûretde kapamacı esnâfından mersûmûn Setrak ve Uncu oğlu Karabet ve Saka oğlu Artin ve Serap ve Serope ve Manil zimmîlerin ber-vech-i muharrer kendi dükkânları’çün hisselerine isâbet eden meblağ-ı mecmû‘-ı mezkûr altı yüz kırk üç guruş ve dört aded sûkda mevcûd kapamacı dükkânlarının gedik mâliklerine ber-vech-i bâlâ isâbet eden bin yedi yüz yetmiş üç guruş on üç buçuk <> akçe ki cem‘an iki bin dört yüz on altı guruş on üç buçuk akçeyi esnâf-ı merkūmûndan bi’l-mürâca‘a taleb ederiz deyü hâzırûn-ı mezbûrûn ikrâr ve tasdîkleriyle da‘vâ ettiklerinde kapamacı esnâfı mersûmûn dahi cevâblarında kazıyye minvâl-i meşrûh üzre olduğunu bi-tamamihâ tâyi‘an ve kat‘iyen ikrâr ve i‘tirâf ve meblağ-ı mecmû‘-ı mezkûr iki bin dört yüz on altı guruş on üç buçuk akçeyi müdde‘ûn-ı mezbûrûna edâ ve teslîme müte‘ahhidler oldukları İstanbul Mahkemesi’nden huzûr-ı âlîlerine i‘lâm olundu el-emr li-veliyyü’l-emr. Fî 22 min-Recebi’l-mürecceb sene 1242 Nüshateyn [Beyaz Beyaz]