İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 347 Hüküm no: 293 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Havva Hatun’un, çörekçi dükkânı gediğinin devri niza’ında, Osman Mehmed ile 1500 guruşa sulh olduğu Çörekçi gediği nizâ‘ından 1500 guruşa sulh Ma‘rûz Sahibe-i arzuhâl mu‘arrefetü’z-zât Şerife Havva Hatun evvelen Çarşamba günü Arz Odası’nda huzûr-ı hazret-i vekâlet-penâhîlerinde bi’l-ma‘iyye istimâ‘a me’mûr Haremeyn-i şerîfeyn müfettişi Emin Beyzâde fazîletlü Abdülkadir Beyefendi ma‘iyyetiyle ve ba‘dehû bi’t-terâzî dâ‘îhânelerinde müfettiş-i mûmâ-ileyh tarafından me’zûn Mevlânâ es-Seyyid Mehmed Es‘ad Efendi dâ‘îleri hazır olduğu hâlde akd olunan meclis-i şer‘-i münîrde derûn-ı arzuhâlde mezkûru’l-isim Osman b. Mehmed nâm kimesne muvâcehesinde Dârü’s-sa‘âdeti’ş-şerîfe ağası hazretleri nezâretlerinde âsûde evkāfdan hudâvendigâr-ı esbak cennet-mekân Sultân Mustafa Hân-ı Sâlis -tâbe serâhu- hazretlerinin İstanbul’da vâki‘ Lâleli Câmi‘-i Şerîfi Vakfı’nın kāimmakām-ı mütevellîsi e‘âzım-ı ricâl-i Devlet-i Aliyye’den atûfetlü el-Hâc Yusuf Efendi hazretleri tarafından mürsel vekîli Ömer Efendi b. Ali hazır olduğu hâlde vakf-ı müşârün-ileyh müstagallâtından İstanbul’da Vâlide Hânı civârında kâin bir bâb çörekçi fırını derûnunda mevcûde gedik ta‘bîr olunur âlât-ı lâzıme-i ma‘lûmenin nısf-ı şâyi‘i babam Şam börekçi el-Hâc Ebûbekir b. Mehmed Memiş nâm kimesnenin bi’l-icâreteyn taht-ı tasarrufunda iken babam mezbûr zikrolunan nısf hisse-i şâyi‘a-i âlât-ı lâzıme-i ma‘lûmeyi yedi bin beş yüz guruş bedel mukābelesinde mezbûr Osman’a ferâğ ve mütevellîsi dahi mezbûr Osman babam merkūm Ebûbekir’e ol kadar akçe bedel vermek üzre izin ve tefvîz temessükü verip lâkin mezbûr Osman babam merkūm Ebûbekir’e bedel-i merkūmu vermedin babam mezbûr fevt olup benimle sulbiye kızı karındaşım gāibe ani’l-meclis Şerife Fâtıma’yı terk etmekle bu sûretde yedimde olup meclis-i şer‘-i şerîfde kırâet olunan fetvâ-yı şerîfede Zeyd icâreteyn ile mutasarrıf olduğu vakıf dükkânı şu kadar akçe bedel mukābelesinde Amr’a ferâğ ve mütevellîsi dahi Amr ve Zeyd’e ol kadar akçe bedel vermek üzre izin ve tefvîz temessükü verip lâkin Amr Zeyd’e bedel-i merkūmu vermese Zeyd dükkân-ı mezbûru re’y-i mütevellî ile ke’l-evvel zabta kādir olur deyü buyurulmağın mûcibince babam mezbûrun ferâğı mu‘teber olmayıp nısf-ı âlât-ı gedik-i mezkûr benimle karındaşım gāibe-i mezbûreye intikāl etmekle âlât-ı gedik-i mezkûrun nısf-ı şâyi‘inden benim hissemi vech-i lâyıkı üzre re’y-i mütevellî ile bana teslîme merkūm Osman’a tenbîh olunmak murâdımdır deyü da‘vâ eylediğimde ol dahi cevâbında baban merkūm el-Hâc Ebûbekir hayatında nısf-ı âlât-ı gedik-i merkūmu o makūle şart olmayarak bilâ-bedel meccânen bana ferâğ ve tefvîz etmişdi deyip ol vechile beynimizde ba‘de’l-münâza‘a beynimiz ıslâh ve te’lîf olunup ben ber-vech-i muharrer tesâddî eylediğim şart müdde‘âmdan bi’t-tav‘ ve’r-rızâ bin beş yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūm bin beş yüz guruşdan mâ‘adâ bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü mukırre-i mezbûre Şerife Havva Hatun’un bi’l-cümle takrîr-i meşrûhunu mezbûr Osman tasdîk ve bedel-i sulh-ı merkūm bin beş yüz guruşu çend-rûz zarfında mezbûre Şerife Havva Hatun’a edâya müte‘ahhid olduğu İstanbul Mahkemesi’nden huzûr. Fî 5 Ş sene 1242