Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 375 Hüküm no: 428 Orijinal metin no: [68a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Serkis v. Cuyan’ın Matos v. Vikoz’dan alacaklı olduğu Mahmiye-i İstanbul’da Vâlide kurbunda sâkin olan işbu bâ‘isü’l-vesîka Serkis v. Cuyan nâm zimmî meclis-i şer‘-i şerîf-i enverde mahrûse-i Üsküdar Kuz[g]uncuk mahallesinde sâkin Matos v. Vikoz nâm zimmî muvâcehesinde üzerine da‘vâ ve takrîr-i kelâm edip mezbûr Matos bundan akdem benim iskemlecim olup beynimizde hesâb gördüğümüzde ba‘de külli’l-hesâb ekmek bahâsından on bin akçe kendi mesârifine sarfla istihlâk etmekle suâl olunup bana edâya tenbîh olunmak matlûbumdur dedikde gıbbe’s-suâl mezbûr Matos cevâbında fi’l-hakīka müdde‘î-i mezbûr Serkis’e cihet-i mezkûreden ber vech-i muharrer ba‘de külli’l-hesâb ekmek bahâsından on bin akçeyi kendi mesârifine sarfla istihlâk etmekle meblağ-ı mezbûr zimmetinde lâzımü’l-edâ deyni olduğu bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı mezbûr on bin akçeyi müdde‘î-i mezbûra edâ ve teslîm mezbûr Matos’a tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâdis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül ser-bölük, İbrahim Çelebi b. kethüdâ Ahmed, Mehmed b. İdris, Ali b. Bâli, [68b] <>, Mehmed b. Bayram, Ali Bey b. Mehmed, İbrahim b. Mehmed.