Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 376 Hüküm no: 429 Orijinal metin no: [68b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Fazlullah Efendi’nin câriyesi Dürri bt. Abdullah’ı azat etmesi Husûs-ı âti’l-beyânın mahallinde ketb [u] tahrîri iltimâs olunmağın savb-ı şer‘den irsâl olunan İbrahim Efendi b. Mehmed mahmiye-i İstanbul’da Karagümrük kurbunda Ali Paşa-yı Atîk mahallesinde müsâfiren sâkin olan fahrü’l-kuzât Fazlızâde demekle ma‘rûf Mustafa Efendi b. el-merhûm Fazlullah Efendi’nin menziline varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i şerîf eyledikde meclis-i ma‘kūd-ı mezbûrda mezbûr Mustafa Efendi ikrâr ve takrîr-i kelâm edip bana rıkkını mu‘[te]rife orta boylu açık kaşlı ala gözlü Rûsiyyetü’l-asl bâ‘isetü’l-kitâb Dürri bt. Abdullah nâm câriye-i memlûkesini hasbeten lillâhi’l-meliki’l-Hallâk ve taleben li merzâti rabbi’r-Rezzâk malından tahrîr ve i‘tâk ve sâir harâir-i asliyyât silkine ilhâk ve idrâc eyledim mevsûfe-i mezbûre Dürri sâir harâir-i asliyyât gibi hürre olup üzerinde velâ-i şer‘îden gayrı hakkım kalmamışdır dedikde vâki‘ hâli Mevlânâ-yı mezbûr mahallinde ketb ü tahrîr ba‘dehû irsâl olunan Mehmed b. İdris ve Ali b. Bâli nâm kimesneler ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene [seb‘a ve tis‘în ve elf]. Şuhûdü’l-hâl: Mefharü’l-kuzât Mehmed Efendi b. el-merhûm Ömer Efendi, Mustafa Çelebi [b.] el-Hâc Ahmed Kethüdâ-yı muhzırân, Ahmed Ağa tâbi‘-i Mehmed Efendi, Ali Çelebi b. ( ).