İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 352 Hüküm no: 298 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Mıgırdıç’ın kazzaz gediğini veresesinin, İsmail Ağa b. Mustafa’ya, onun da yarı hissesini vereseden Domik bt. İsayi’ye sattığı Kazzâz mübâya‘ası Ma‘rûz Âsitâne-i aliyyede vâki‘ kazzâz esnâfından olup İstanbul’da Langa kurbünde Kâtib Kasım mahallesinde mütemekkin iken bundan akdem hâlik olan Karabet v. Mıgırdıç zimmînin verâseti zevce-i metrûkesi Domik bt. İsayi nâm Nasrâniye ile sulbî sagīr oğulları Kigork ve Kirkor ve sulbiye kebîre kızı Yakut ve sulbiye sagīre kızları Lusbi ve Efimiye ve zevce-i mesfûrenin batnında müstebîn hamle inhisârı tahakkukundan sonra umûr-ı sıgār-ı mesfûrûn ile haml için tevkīf olunan hisseyi kabza vasî nasb olunan zevce-i mesfûre Domik Nasrâniye tarafından vekîl-i müseccel-i şer‘îsi Sarrâf Ohannes v. Vaks ve mersûme Yakut Nasrâniyenin zevci tarafından husûs-ı âtîde vekîl-i müsbet-i şer‘îsi Kazzâzcı Kerope v. Agop zimmîden her biri meclis-i şer‘-i şerîf-i enverde İsmail Ağa b. Mustafa nâm kimesne muvâcehesinde her biri bi’l-vekâle takrîr-i kelâm edip hâlik-i mersûmun sağlığında ile’l-helâk yedinde bâ-sûret mâlı olup ba‘de helâkihî veresesi mesfûrûna mevrûs olan İstanbul’da Çarşı-yı Kebîr’de Sandal bezzâzistânı civârında Derziler sûkunda sarrâf köşesinden hayyâtîne müntehî oluncaya değin vâki‘ sûk tarafeyninde kâin dekâkînden ikinci dükkân ta‘bîr olunur iki kepenk bir bâb kazzâz dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf hisse-i şâyi‘asını şurût-ı müfsideden ârî tarafeynden bi’l-îcâb ve’l-kabûl bâtten ve sahîhan bi-safkatin vâhidetin semen-i misli idüğü ihbâr olunan dört bin beş yüz guruş semen-i makbûza mezbûr İsmail Ağa’ya bâ-izn-i şerîk bi’l-vekâle bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl edip fîmâ-ba‘d nısf hisse-i şâyi‘a-i mezkûre merkūm İsmail Ağa’nın mülk-i müşterâsı olup verese-i mesfûrûnun alâkaları kalmamışdır deyü ba‘de’l-ikrâr ve’t-tasdîk merkūm İsmail Ağa meclis-i şer‘-i münîrde zevce-i mersûme Domik Nasrâniye tarafından husûs-ı âtîde tasdîka vekîl-i şer‘îsi mesfûr Ohannes zimmî muvâcehesinde ber-vech-i muharrer ânifen iştirâ eylediğim nısf hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile müvekkile-i mersûme Domik Nasrâniyeye dört bin beş yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d sâlifü’z-zikr bir bâb dükkân gediği ta‘bîr olunur âlât-ı lâzıme-i ma‘lûmenin nısf-ı şâyi‘i müvekkile-i mesfûre Domik Nasrâniyenin mal-ı müşterâsı ve hakk-ı sırfı olup benim alâkam kalmamışdır deyü takrîrini vekîl-i mersûm tasdîk etmeğin bu sûretde zikrolunan dükkân gediğinin nısf-ı şâyi‘i hâlik-i mersûm Karabet zimmînin üzerinde olan kaydı ref‘ ve terkīn ve müvekkile-i mersûme Domik Nasrâniye ismine tashîhan kayd ile kaleminden yedine sûret i‘tâsını istid‘â eyledikleri İstanbul Mahkemesi’nden huzûr. Fî 3 Ş sene 1242