İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 354 Hüküm no: 299 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros v. Avakim’in kazzaz gediğini, Feyzullah Ağa b. Mehmed’e sattığı Kazzâz mübâya‘ası Ma‘rûz Âsitâne-i aliyyede vâki‘ kazzâz esnâfından Bedros v. Avakim nâm zimmî meclis-i şer‘-i münîrde bâ‘isü’l-i‘lâm Feyzullah Ağa b. Mehmed nâm kimesne muvâcehesinde takrîr-i kelâm edip İstanbul’da Çarşı-yı Kebîr’de Çakır Ağa zukāğında Yağlıkçılar köşesinden Sipâh Pazarı’na varıncaya değin sûk tarafında kâin ma‘lûmü’l-hudûd bir kepenkli bir bâb kazzâz dükkânı derûnunda mevcûde beyne’l-hiref gedik ta‘bîr olunur âlât-ı lâzıme-i ma‘lûme bâ-sûret müstakillen yedimde mülküm olmağla hâlâ ben ber-vech-i muharrer mâlik olduğum âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin merkūm Feyzullah Ağa’ya üç bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i ma‘lûme mezbûr Feyzullah Ağa’nın mülk-i müşterâsı ve hakk-ı sırfı olup benim kat‘a alâka ve medhalim kalmamışdır deyü ba‘de’t-takrîr ve’t-tasdîk gedik-i mezkûr bâyi‘-i mersûm üzerinde olan kayd-ı evveli kaleminden ref‘ ve terkīn ve müşteri-i merkūm Feyzullah Ağa ismine tasrîhan kayd ile müceddeden yedine sûret i‘tâsını istid‘â eyledikleri huzûr. Fî 10 Ş sene 1242