İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 354 Hüküm no: 300 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Mıgırdıç’ın kazzaz gediğini veresesinin, İsmail Ağa b. Mustafa’ya, onun da Karabet’in dâmadı Kerope v. Agop’a sattığı Kazzâz mübâya‘ası Ma‘rûz Âsitâne-i aliyyede vâki‘ kazzâz esnâfından olup İstanbul’da Langa kurbünde Kâtib Kasım mahallesinde mütemekkin iken bundan akdem hâlik olan Karabet v. Mıgırdıç zimmînin verâseti zevce-i metrûkesi Domik bt. İsayi nâm Nasrâniye ile sulbî sagīr oğulları Kigork ve Kirkor ve sulbiye kebîre kızı Yakut ve sulbiye sagīre kızları Lusbi ve Efimiye ve zevce-i mersûmenin batnında müstebîn hamle inhisârı tahakkukundan sonra umûr-ı sıgār-ı mesfûrûn ile haml için tevkīf olunan hisseyi kabza vasî nasb olunan zevce-i mesfûre Domik Nasrâniye tarafından vekîl-i müseccel-i şer‘îsi Sarrâf Ohannes v. Vaks ve bint-i mersûme Yakut Nasrâniyenin zevci tarafından husûs-ı âtîde vekîl-i müsbet-i şer‘îsi Kazzâzcı Kerope v. Agop zimmîden her biri meclis-i şer‘-i şerîfi enverde İsmail Ağa b. Mustafa nâm kimesne muvâcehesinde her biri bi’l-vekâle takrîr-i kelâm edip hâlik-i mersûmun sağlığında ile’l-helâk yedinde bâ-sûret mâlı olup ba‘de helâkihî veresesi mesfûruna mevrûs olan İstanbul’da Kebabcılar Hânı’nda tabaka-i süflâda sağ tarafda vâki‘ birbirine muttasıl iki bâb kazzâz odası derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin el-yevm semen-i misli idüğü ihbâr olunan dört bin sekiz yüz guruş semen-i makbûza mezbûr İsmail Ağa’ya bi’l-vekâle bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl edip fîmâ-ba‘d zikrolunan iki bâb odaların gedikleri ta‘bîr olunur âlât-ı lâzıme-i ma‘lûmeler merkūm İsmail Ağa’nın mülk-i müşterâsı olup verese-i mesfûrûnun alâkaları kalmamışdır deyü ba‘de’l-ikrâr ve’t-tasdîk merkūm İsmail Ağa meclis-i şer‘-i münîrde mesfûr Aci <> Kerope zimmî muvâcehesinde ber-vech-i muharrer ânifen iştirâ eylediğim iki bâb odaların gedikleri ta‘bîr olunur âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ve safka-i vâhide ile mersûm Aci <> Kerope zimmîye dört bin sekiz yüz guruş semen-i makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d sâlifü’z-zikr iki bâb oda gedikleri ta‘bîr olunur âlât-ı lâzıme-i ma‘lûme mesfûr Aci <> Kerope zimmînin mal-ı müşterâsı ve hakk-ı sırfı olup benim alâkam kalmamışdır deyü takrîrini mersûm [58b] Aci Kerope <> zimmî tasdîk etmeğin bu sûretde zikrolunan oda gediklerinin hâlik-i mersûm Karabet zimmî üzerinde olan kaydı ref‘ ve terkīn ve mersûm Aci <> Kerope zimmî ismine tashîhan kayd ile başka başka iki kıt‘a sûret i‘tâsını istid‘â eyledikleri İstanbul Mahkemesi’nden huzûr. Fî 3 Ş sene 1242