İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 367 Hüküm no: 310 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eftad v. Lofa’nın yanan bakkal dükkânını, beş buçuk zirâ’dan yüksek inşa edemeyeceği Bakkal dükkânı keşfi Ma‘rûz Sâdır olan fermân-ı âlîlerine imtisâlen zikri câ’î husûsun mahâllinde lede’l-mu‘âyene keşf ve tahkīki’çün cânib-i şerî‘at-i garrâdan me’zûnen irsâl olunan Kâtib Mehmed Hidâyetullah Efendi dâ‘îleri [ve] hâssa mi‘mârı hulefâsından Selim Sâbit ve Mustafa Seydâ Halîfeler ile nezâret-i dâ‘îlerinde olan evkāfdan Kuds-i şerîfde vâki‘ Marikob Manastırı fukarâsı ta‘âmiyelerine meşrûta vakıf müsakkafâtından İstanbul’da Kumkapı dâhilinde Şeyhferhad mahallesinde Cüce Çeşmesi civârında köşe başında vâki‘ Çavuşbaşı dükkânı demekle ma‘rûf bir tarafdan Sarrâf Mardiros v. Agop zimmî menzili arsası ve yine vakf-ı mezbûrdan bir tarafdan Taşçıoğlu Mıgırdıç zimmî menzili arsası ve tarafeyni tarîk-ı âm ile mahdûd münâza‘un-fîh olan muhterik bakkāl dükkânı arsasına varıp cerîdede mazbûtü’l-esâmî Müslimîn huzûrlarında akd-i meclis-i şer‘-i âlî ettikde zikrolunan bakkāl dükkânı arsasına şehriye yirmi akçe icâre-i müeccele ile bâ-temessük-i mütevellî bi’l-icâreteyn müstakillen mutasarrıf olan sahib-i arzuhâl Bakkal Eftad v. Lofa zimmî meclis-i ma‘kūd-ı mezkûrda yine vakf-ı mezbûrdan dükkân-ı mezkûr arsasının hevâsına senevî beş yüz on akçe icâre-i müeccele ile bâ-temessük-i mütevellî müstakillen mutasarrıf olan derûn-ı arzuhâlde mastûrü’l-ism mersûm Mardiros zimmî muvâcehesinde vakf-ı mezbûr mütevellîsi Zakar v. İstefan zimmî tarafından mürsel vekîli câbî-i vakf Avadis v. Agop zimmî hazır olduğu hâlde işbu derûnunda akd-i meclis-i şer‘-i âlî olunan bakkāl dükkânının kaddi mukaddemâ yedi zirâ‘ iken bi-kazâillâhi te‘âlâ bundan akdem vukū‘ bulan harîkde muhterik olmağla ben bu esnâda arsa-i mezkûre üzerine mâlımla müceddeden bir bâb bakkāl dükkânı binâ murâd eylediğimde mersûm Mardiros zimmî dükkân-ı mezkûru kadîm kaddi beş buçuk zirâ‘ idi deyü <> ziyâde terfî‘den beni men‘ etmekle mümâna‘atı men‘ olunmak murâdımdır deyü eylediği da‘vâsını kâtib-i mezbûr dâ‘îleri mahâllinde ketb ve tahrîr ve ma‘an meb‘ûs ümenâ-i şer‘le tarafeyn hazır oldukları hâlde meclis-i şer‘a gelip alâ-vukū‘ihî inhâ etmeğin bu sûretde hâmiş-i arzuhâlde mastûr hâssa mi‘mârı ağa bendeleri cerîdesinden muhrec derkenâr nâtık olduğu üzre bu makūle bakkāl dükkânları beş buçuk arşın kaddinde inşâ olunmak bu def‘a ebniye nizâmı hakkında sudûr eden fermân-ı âlî-şânda sarâhaten mezkûr ve el-yevm dahi ber-mûcib-i emr-i âlî inşâ olunmakda olup ziyâde terfî‘i memnû‘ idüğü müdde‘î-i mersûm Eftad zimmîye tefhîm olunduğu İstanbul Mahkemesi’nden huzûr. Fî 24 Ş sene [1]242