İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 374 Hüküm no: 318 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salamon v. Yaşova’nın, kazzaz gediğini Vasil v. Petro’ya sattığı Kazzâz gediği mübâya‘ası Ma‘rûz Âsitâne-i aliyyede vâki‘ kazzâz esnâfından Salamon v. Yaşova Yahûdî meclis-i şer‘-i münîrde yine esnâf-ı merkūmeden Vasil v. Petro zimmî muvâcehesinde takrîr-i kelâm edip İstanbul’da Çarşı-yı Kebîr’de Du‘â Meydânı kurbünde kazzâzân esvâkından Daracık Zukāk demekle arîf sûkda vâki‘ Kazzâz Mertafe oğlu İstavri ile Kazzâz Boyacıoğlu Nikola zimmîler ve dükkânları beynlerinde kâin bir kepenk bir bâb kazzâz dükkânı derûnunda mevcûde Başmuhâsebe’de kendi ismime mukayyed ve mu‘teber beyne’l-esnâf gedik ta‘bîr olunur akd-i âti’z-zikrin sudûruna değin bâ-sûret müstakillen yedimde mâlım olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin bin beş yüz guruş semen-i medfû‘ ve makbûza mersûm Vasil zimmîye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik fîmâ-ba‘d gedik ta‘bîr olunan âlât-ı lâzıme-i ma‘lûme mesfûr Vasil zimmînin mülk-i müşterâsı ve hakk-ı sırfı olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun kaleminde olan kayd-ı evveli bâyi‘-i mersûm üzerinden ref‘ ve terkīn ve müşteri-i mersûm Vasil zimmî ismine tasrîhan kayd ile yedine müceddeden bir kıt‘a sûret i‘tâsını istid‘â ve istirhâm eyledikleri İstanbul Mahkemesi’nden huzûr. Fî 21 Ş sene 1242