İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 374 Hüküm no: 319 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstavri v. Petro’nun, kazzaz gediğini Sabatay v. İsak’a sattığı Kazzâz gediği mübâya‘ası Ma‘rûz Âsitâne-i aliyyede vâki‘ kazzâz esnâfından İstavri v. Petro nâm zimmî meclis-i şer‘-i münîrde yine esnâf-ı merkūmeden bâ‘isü’l-i‘lâm Sabatay v. İsak Yahûdî muvâcehesinde takrîr-i kelâm edip İstanbul’da Çarşı-yı Kebîr’de kazzâz esvâkından Sipâh Çarşısı’na giden orta zukākda vâki‘ İsak Yahûdî ile Kazzâz Kirkor zimmî dükkânları beynlerinde kâin bir kepenk bir bâb kazzâz dükkânı derûnunda mevcûde Başmuhâsebe’de kendi ismime mukayyed ve mu‘teber beyne’l-esnâf gedik ta‘bîr olunur akd-i âti’z-zikrin sudûruna değin bâ-sûret müstakillen yedimde emvâlim olan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin bin guruş semen-i medfû‘ ve makbûza mersûm Sabatay Yahûdiye bey‘ ve temlîk ve teslîm eylediğimde ol dahi ba‘de’l-iştirâ ve’t-temellük ve’t-tesellüm ve’l-kabz ve’l-kabûl mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik ba‘de’l-yevm dükkân-ı mezkûr derûnunda mevcûde gedik ta‘bîr olunan âlât-ı lâzıme-i ma‘lûme mersûm Sabatay Yahûdinin emvâl-i müşterâtı ve hakk-ı sırfı olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘-i mersûm üzerinde olan kayd-ı evveli ref‘ ve terkīn ve müşteri-i mersûm Sabatay Yahûdî ismine tasrîhan kayd ile yedine kaleminden müceddeden bir kıt‘a sûret i‘tâsını mersûm Sabatay Yahûdî istid‘â ve istirhâm eylediği İstanbul Mahkemesi’nden huzûr. Fî 21 Ş sene 1242