İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 375 Hüküm no: 320 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tavit v. Avram’ın, kazzaz gediğini Avram Yakof’a sattığı Kazzâz mübâya‘ası Ma‘rûz Âsitâne-i aliyyede vâki‘ kazzâz esnâfından Tavit v. Avram Yahûdî meclis-i şer‘-i münîrde yine esnâf-ı merkūmeden bâ‘isü’l-i‘lâm Avram v. Yakof nâm Yahûdî muvâcehesinde takrîr-i kelâm edip İstanbul’da Çarşı-yı Kebîr’de Çakır Ağa zukāğı demekle ma‘rûf sûkda Kalpakçılar karşısında Dülbendciler zukāğı başında Yağlıkçılar sûkunda basmacı dükkânına müntehî oluncaya değin vâki‘ sûkda Kazzâz Avram Yahûdî ile Yanko zimmî dükkânları beynlerinde kâin bir kepenk bir bâb kazzâz dükkânı derûnunda mevcûde Başmuhâsebe’de ismime mukayyed ve mu‘teber beyne’l-esnâf gedik ta‘bîr olunur akd-i âti’z-zikrin sudûruna değin bâ-sûret müstakillen yedimde mâlım olan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Avram Yahûdiye iki bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mersûm Avram Yahûdinin mülk-i müşterâsı ve hakk-ı sırfı olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘-i mersûm üzerinde olan kayd-ı evveli tay ve terkīn ve müşteri-i mersûm ismine tashîhan kayd ile kaleminden yedine müceddeden bir kıt‘a sûret i‘tâsını istid‘â ve istirhâm eyledikleri İstanbul Mahkemesi’nden huzûr. Fî 21 Ş sene 1242