Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 377 Hüküm no: 431 Orijinal metin no: [69a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. İsmail’in evini Hacı Hasan b. Mustafa’ya satması Dârü’l-hilâfeti’l-aliyye Kostantıniyye el-mahmiyye’de Kâtib Muslihiddin mahallesi sâkinlerinden Mustafa Çelebi b. İsmail nâm kimesne meclis-i şer‘-i şerîf-i enverde bâ‘isü hâze’l-kitâb el-Hâc Hasan b. Mustafa nâm kimesne mahzarında ikrâr-ı tâm ve takrîr-i kelâm edip akd-i âtî sudûruna değin yedimde mülk ve hakkım olup mahalle-i merkūmede vâki‘ etrâf-ı erba‘ası Mustafa Efendi veresesi mülkü ve merkūm el-Hâc Hasan mülkü ve Medîne-i Münevvere vakfından arabacı el-Hâc Mustafa tasarrufunda olan menzil ve tarîk-i âm ile mahdûd yedinde olan hüccet nâtıka olduğu üzerine binâlı ve binâsız mecmû‘-ı arsası tûlen ve arzen bi hesâb-ı terbî‘î bin üç yüz altmış iki buçuk zirâ‘ olup üzerine mebnî tahtânî üç bâb oda ve bir su kuyusu[nu] müştemil mülk menzilimi cemî‘ tevâbi‘ ve levâhıkı ve âmme-i hukūk ve merâfıkı ile mezbûr el-Hâc Hasan’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile beş yüz esedî guruşa bey‘ ve teslîm ol dahi ber vech-i muharrer iştirâ ve tesellüm eyledikden sonra semeni olan meblağ-ı mezbûr beş yüz guruşu mezbûr el-Hâc Hasan’dan tamâmen ahz u kabz eyledim ba‘de’l-yevm menzil-i mahdûd-ı mezkûr merkūm el-Hâc Hasan’ın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Şeyh Hüseyin Efendi b. Mehmed, Mehmed Çelebi b. Mustafa el-Müderris, İbrahim b. Mustafa, Halil b. İbrahim, Mehmed b. Halil, İbrahim Çelebi b. Mustafa.