İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 384 Hüküm no: 332 Orijinal metin no: [63b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan’ın ilk gecesinde camilerin minarelerindeki kandillerin yakılmasına dair hüküm Kandil-i leyâlî-i Ramazan-ı pür-feyezân Bâ-sahh-ı âlî İstanbul kādısı fazîletlü efendi İşbu i‘lâm-ı hâk-i pây-i hümâyûn-ı mülûkâneye lede’l-arz mûcibince leyle-i mübârekede îkād-ı kanâdîl olunmak üzre kayyûmbaşılara tenbîh oluna deyü hatt-ı şerîf-i şâhâne şeref-yâfte-i sudûr olmağla mantûk-ı münîfi icrâ eyleyesin deyü. Fî-Selh-i Ş sene [1]242 Dergâh-ı felek-tâk ve bârgâh-ı rezîn-nıtâklarına ma‘rûz-ı abd-i adîmü’l-istihkāk oldur ki Dürrü’l-ferîd sübha-i a‘vâm olan işbu kırk iki sâl-i fütûhât-iştimâlinin hilâl-i Şa‘bânı Salı gecesi incilâ-bahş-uyûn-ı şuhûd olduğu ber-nehc-i şer‘î sâbit olup mâh-ı merkūmun selhinde ya‘nî Çarşamba gecesi pertev-firûz-ı ufk-ı feyz olan mihmân-ı azîzü’l-vücûd hilâl-i şehr-i Ramazan arz-ı dîdâr-ı envârü’l-me‘ân kılmadığı sûretde ber-iktizâ-yı şerî‘at-i garrâ Şa‘bâni’l-mu‘azzam eyyâm-ı selâsîn ile resîde-i encâm ve işbu Perşembe günü gurre-i garrâ-yı Ramazan ve evvel-i sıyâm olmağla ber-kā‘ide-i hasenât-ı âide-i Devlet-i Aliyye-i Muhammediye leyle-i Hamîs-i mezkûrede bi’l-cümle minârât-ı mesâcid ve cevâmi‘ iş‘âl-i kanâdîl ile envâr-ı lâmi‘ kılınmak bâbında fermân-ı âlî-şân ısdârı iktizâ eylediği İstanbul Mahkemesi’nden atebe-i gerdûn-mertebeye i‘lâm olundu bâkī emr u fermân hazret-i veliyyü’l-emrindir. Fi’l-yevmi’s-sâmin ve’l-işrîn mine’ş-şehri’l-merkūm li-seneti’l-müteyemminetü’l-muharrere.