İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 386 Hüküm no: 334 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Ağa b. Abdullah’ın, kendisine borçlu olan Musa Ağa b. Mehmed ile 1300 guruşa sulh olduğu 1300 guruşa sulh Ma‘rûz Sahib-i arzuhâl Mühtedî Abdullah Ağa b. Abdullah nâm kimesne meclis-i şer‘-i münîrde derûn-ı arzuhâlde mezkûru’l-ism es-Seyyid Musa Ağa b. es-Seyyid Mehmed muvâcehesinde ben bin iki yüz otuz yedi senesi vilâyet-i Anadolu’da Kayseriye’de vâki‘ gāib ani’l-meclis zu‘amâdan Ali Ağa nâm kimesnenin bâ-berât-ı âlî-şân mutasarrıf olduğu Büyük Çukur nâm karye ze‘âmetini sene-i mezbûre Martı ibtidâsından bir seneliğini ol târihde Kayseriye sancağı mutasarrıfı vüzerâ-yı ızâmdan sa‘âdetlü el-Hâc Hüseyin Paşa hazretlerinin sarrâfı olmam takrîbiyle vâlî-i müşârün-ileyh taraflarından şurûtu mûcibince mutasarrıfı gāib-i merkūm Ali Ağa’dan iki bin yedi yüz elli guruş bedel mukāvelesiyle mezbûr es-Seyyid Musa Ağa’<> ya ilzâm ettirmemle ol vechile merkūm es-Seyyid Musa Ağa’nın bi-şartı’r-rücû‘ emriyle gāib-i mezbûr Ali Ağa’ya mâlımdan verdiğim bedel-i mezkûr iki bin yedi yüz elli guruş ve tımar-ı mezkûrun mesârif-i sâiresine dahi kezâlik mezbûrun emriyle mâlımdan masrûfum olan beş yüz elli guruş ki cem‘an mezbûr es-Seyyid Musa Ağa’nın zimmetinde bi’l-mürâca‘a alacak hakkım olan üç bin üç yüz guruşu mezbûrdan hâlâ taleb ederim deyü tesâddî eylediğim da‘vâmdan bâ-tavassut-ı muslihîn merkūm es-Seyyid Musa Ağa ile bi’t-tav‘ ve’r-rızâ bin üç yüz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâdesi olan iki bin guruşa müte‘allika da‘vâdan mezbûr es-Seyyid Musa Ağa’nın zimmetini kabûlü hâvî ibrâ ve ıskāt eyledim deyü ba‘de’l-ikrâr ve’t-tasdîk ibrâdan müstesnâ bedel-i sulh-ı merkūm bin üç yüz guruş zimmetinde müdde‘î-i mezbûra sahîhan deyni olduğunu merkūm es-Seyyid Musa Ağa tâyi‘an ve kat‘iyen ikrâr ve i‘tirâf etmeğin alâ-mûcib-i i‘tirâfihî bedel-i sulh-ı mezkûr bin üç yüz guruşun müdde‘î-i mezbûr Abdullah Ağa’ya edâ ve teslîmiyle merkūm es-Seyyid Musa Ağa ilzâm olunduğu İstanbul Mahkemesi’nden huzûr. Fî 22 min-şehri Ramazani’l-mübârek sene 1242