İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 387 Hüküm no: 335 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapatılan arpacı dükkânlarının vasî marifetiyle mallarının satılıp bedellerinin vekillerine teslim edildiği Mefkūd arpacıların vasî yedinden 610 buçuk guruşu kabzı Ma‘rûz Âsitâne-i aliyyede <> Kapan-ı dakīk hâric ve dâhilinde vâki‘ bi’l-cümle arpacı esnâfı bundan akdem bâ-emr-i âlî vilâyetlerine i‘zâm olunmuş ve esnâf-ı merkūmenin mahâll-i merkūmda kâin dükkânları sedd ü bend ile mezbûrûnun gerek cânib-i mîrî ve gerek tüccâra olan deynleri ve ba‘zı kesân zimmetlerinde matlûbâtları alâ-hâlihî kalmış olduğundan bahisle merkūmûnun mâlları olup dekâkîn-i mezkûrîn derûnlarında mevcûd zahîreleri ma‘rifet-i şer‘ ve tüccâr ma‘rifetiyle semen-i misilleriyle âhara füruht olunarak semenleri mîrî ve kapan tüccârına olan deynlerine ba‘de’l-edâ ve fazla kalır ise esnâf-ı merkūme tarafına teslîm olunması bâbında ricâl-i Devlet-i Aliyye’den hâlâ zahîre nâzırı izzetlü Mehmed Ârif Efendi bendelerinin memhûr takrîri bâlâsına unvânı sahh-ı âlî ile müveşşah bu dâ‘îlerine hitâben sâdır olan fermân-ı âlîlerine imtisâlen evvelen dekâkîn-i mezkûrînin kuflü ma‘rifet-i şer‘le küşâd olundukdan sonra derûnlarında mevcûd olup kıbel-i şer‘den vasî nasb olunan kapan-ı merkūm tüccârından es-Seyyid Veliyüddin Yazıcı karındaşı demekle meşhûr es-Seyyid Ali Ağa b. es-Seyyid Mustafa ve <> ve tüccâr ma‘rifetleri ve semen-i misilleriyle âhara bey‘ olunan ma‘lûmü’l-keyl ve’l-fiyât erzen ve kokoroz ve şa‘îrin esmânından cem‘an elli sekiz bin beş yüz iki buçuk guruş on dokuz para vasîyy-i mezbûr es-Seyyid Ali Ağa yedinde olup esnâf-ı merkūmûnun gerek düyûn-ı mezkûre ve gerek matlûbâtı husûsu ber-mûcib-i şerî‘at-i garrâ inde’t-terâfu‘ muvâcehe-i hasm-ı şer‘î lâzımeden olduğuna binâen kendi taraflarından vekîl-i müsbet-i şer‘îleri zuhûruna değin tevkīf olunmuşdu el-hâletü hâzihî esnâf-ı mezbûreden Uzun Memiş b. Ali nâm kimesne tarafından vekâlet-i âmme-i mutlaka ile vekîli olduğu arpacı esnâfından el-Hâc İsmail Ağa b. Hasan ve bu def‘a me’zûnen Âsitâne-i aliyyeye gelen Âşık Mehmed oğlu Yusuf b. Mehmed nâm kimesneler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan buğday döğmeci Hüseyin Ağa b. Hasan meclis-i şer‘-i enverde vasîyy-i mezbûr es-Seyyid Ali Ağa mahzarında kapan-ı merkūm tüccârı hazır oldukları hâlde kapan-ı merkūm hâricinde Yahûdhâne tahtında kâin müvekkilim mezbûrun sâkin olduğu birbirine muttasıl iki bâb arpacı dükkânlarında mevcûd mâlı olup râyic-i vakt üzre beher keyli yetmişer paraya olarak ma‘rifet-i şer‘le âhara bey‘ olunan iki yüz altı keyl şa‘îrin esmânı olan üç yüz altmış buçuk guruş ve beher keyli ellişer paraya olarak kezâlik âhara bey‘ olunan iki yüz keyl şa‘îrin esmânı olan <> iki yüz elli guruş ki cem‘an vasîyy-i merkūm es-Seyyid Ali Ağa’nın bi’l-vesâye makbûzu olan altı yüz on buçuk guruşu deyn-i mîrîsi olmadığına binâen düyûn-ı sâiresini edâ ve bakī kalır ise kendüye îsâl ve teslîm için tamamen bana def‘ ü teslîm ben dahi yedinden bi’l-vekâle ahz ü kabz edip min-ba‘d meblağ-ı mezkûrdan müvekkilim mezbûrun vasîyy-i merkūm es-Seyyid Ali Ağa yedinde bir akçe ve bir habbe hakkı ve alacağı kalmadı deyü ikrâr ve tasdîkleri İstanbul Mahkemesi’nden huzûr. Fî 27 Ş sene 1242