İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 394 Hüküm no: 344 Orijinal metin no: [65a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Andon ile Luksi bt. Todori’nin ev müştemilatı niza’ından bedelsiz sulh oldukları Tatavla’da menzil keşfi Ma‘rûz Sâdır olan fermân-ı âlî-şâna imtisâlen zikri âtî husûsun mahâllinde lede’l-mu‘âyene keşf ve tahkīki’çün savb-ı şer‘-i enverden me’zûnen irsâl olunan Kâtib Hasan Şükrü Efendi dâ‘îleri bi’l-ma‘iyye rü’yete me’mûr nezâret-i hazret-i şeyhülislâm-ı sellemehü’s-selâmîde âsûde evkāf müfettişi müderrisîn-i kirâm-ı zevi’l-ihtirâmdan Meşreb Efendi hafîdi fazîletlü Mehmed Ârif Efendi tarafından meb‘ûs Kâtib İmâmzâde Ali Rıza Efendi hâssa mi‘mârı hulefâsından Derviş Ahmed ve Mehmed Necib Halîfeler ile hâmiş-i arzuhâlde mastûr derkenâr nâtık olduğu üzre nezâret-i hazret-i müşârün-ileyhde âsûde evkāfdan hudâvendigâr-ı esbak cennet-mekân firdevs-âşiyân Sultân Abdülhamid Han Hazretlerinin Evkāf-ı celîleleri mülhâkātından sadrazam-ı esbak-ı merhûm Çorlulu Ali Paşa Vakfı müsakkafâtından mahrûse-i Galata’ya muzâfe kasaba-i Kasımpaşa’da Tatavla nâm mahâlde vâki‘ bir tarafdan İstori zimmî veresesi menzili ve bir tarafdan Mihalaki zimmî veresesi menzili ve bir tarafdan zikri câ’î hâlik Attar Yanako v. Sarafim zimmî veresesi menzili ve taraf-ı râbi‘i tarîk-ı âm ile mahdûd [65b] bir bâb menzile varıp huzûr-ı Müslimînde akd-i meclis-i şer‘-i âlî ettiklerinde menzil-i mezkûra bâ-temessük-i mütevellî bi’l-icâreteyn müstakillen mutasarrıf olan derûn-ı arzuhâlde mastûrü’l-ism Varulcı Mihal v. Andon zimmî vakf-ı müşârün-ileyh mütevellîsi ricâl-i Devlet-i Aliyye’den hâlâ evkāf-ı hümâyûn nâzırı sa‘âdetlü el-Hâc Yusuf Efendi tarafından mürsel vekîl-i şer‘îleri el-Hâc Ömer Efendi b. Hasan nâm kimesne hazır olduğu hâlde meclis-i ma‘kūd-ı mezkûrda menzil-i mezkûr ittisâlinde olup diğer hâmiş-i arzuhâlde mastûr derkenâr nâtık olduğu üzre nezâret-i dâ‘îlerinde olan evkāfdan İstanbul’da Eğrikapı dâhilinde Molla Aşkī Câmi‘-i şerîfine şeyhü’l-kurrâ ve cihât-ı sâire vaz‘ eden ashâb-ı hayrâtdan merhûm es-Seyyid el-Hâc Osman Efendi Vakfı müstagallâtından ma‘lûmü’l-hudûd bir bâb menzile babaları hâlik-i mersûm Yanako zimmîden intikāl-i âdî ile eslâsen mutasarrıflar olan Nikola ve Mihal ve Maryora nâm sagīrlerin anaları ve min-kıbeli’ş-şer‘ bâ-hüccet vasîyy-i mansûbeleri sahibe-i arzuhâl mu‘arrefetü’ş-şahs Luksi bt. Todori nâm Nasrâniye muvâcehesinde mârrü’l-beyân es-Seyyid el-Hâc Osman Efendi Vakfı’nın mütevellîsi es-Seyyid Mehmed Es‘ad b. Mustafa Tahir hazır olduğu hâlde benim ber-vech-i muharrer mutasarrıf olduğum menzil-i mezkûrun zukāk kapısına mürûr edecek mi‘mârân-ı mezbûrân misâhalarıyla terbî‘an otuz beş zirâ‘ mahalli vasîyy-i mersûme Luksi Nasrâniye vasîleri olduğum sadrî evlâdım sagīrûn-ı mersûmûn mutasarrıflar oldukları menzilleri müştemilâtındadır deyü bi-gayr-ı hakkın müdâhale ve ol vechile beni menzil-i mezkûrumun zukāk kapısından hurûcuma mümâna‘at etmekle müdâhalesi men‘ ü def‘ olunmak murâdımdır deyü mütevellî-i mûmâ-ileyh vekîli hâzır-ı merkūmun tasdîkiyle vasîyy-i mersûme Luksi Nasrâniye ile mütevellîsi hâzır-ı mezbûr es-Seyyid Mehmed Es‘ad Efendi’nin inkârlarına mukārin tesâddî eylediği da‘vâsını kâtibân-ı mezbûrân mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip tarafeyn ve mütevelliyân <> asîl ve vekîl merkūmân hazır oldukları hâlde tasdîklerine mukārin alâ-vukū‘ihî ba‘de’l-inhâ ve’t-takrîr muslihûn tavassutuyla beynleri te’lîf ve tanzîm olunup mersûm Mihal zimmî ben ber-vech-i muharrer mutasarrıf olduğum menzil-i mezkûrumun zukāk kapısına mürûr edecek mahâll-i merkūmun kapıya varınca tûlen tansîfen bi-hesâb-ı terbî‘î on yedi buçuk zirâ‘ mahâllini zikrolunan Çorlulu Ali Paşa Vakfı’ndan olarak hüsn-i rızâ ve tayyib-i hâtırım ve ferâğ-ı mu‘teber-i kat‘î ile bâ-re’y-i mütevellî vasîyy-i mersûme Luksi Nasrâniyeye icâre-i ma‘lûmesiyle meccânen ferâğ ve tefvîz ve teslîm eylediğimde ol dahi kendi nefsi’çün tefevvüz ve tesellüm ve kabûl eyledi deyü mukırr-ı mersûmun bi’l-cümle takrîr-i meşrûhunu mersûme Luksi Nasrâniye ile mütevelliyân-ı asîl ve vekîl-i merkūmândan her biri ba‘de’t-tasdîk bu vechile külliyen kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî 5 N sene 1242