İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 396 Hüküm no: 345 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa ile ortağının, Takar v. Panayot’ta olan alacaklarını erteledikleri 700 guruş tecîl Ma‘rûz Âsitâne-i aliyyede vâki‘ keresteci esnâfından es-Seyyid el-Hâc Hasan Ağa b. es-Seyyid Mustafa nâm kimesne ile şerîki sahib-i arzuhâl Marko v. Yasef nâm zimmî meclis-i şer‘-i münîrde derûn-ı arzuhâlde mastûrü’l-ism neccâr tâifesinden Lefter v. Panayot zimmî muvâcehesinde mersûm Lefter zimmî işbu hazır bi’l-meclis es-Seyyid Ahmed Ağa b. es-Seyyid Zeynelabidin nâm kimesnenin bi’l-icâreteyn mutasarrıf olduğu İstanbul’da Hocapaşa kurbünde Dâye Hatun mahallesinde kâin ma‘lûmü’l-hudûd bir bâb menzilini bi’l-mukāvele inşâ eylediği esnâda yedimizden ve mal-ı şirketimizden iştirâ ve kabz eylediği ma‘lûmü’l-ecnâs ve’l-fiyât kereste semeninden alacak hakkım olan bin üç yüz guruşun beş yüz guruşunu zimmî-i mersûmûn ahz ü kabz ve yüz guruşunu rızâmızla hat ve tenzîl ve mutâlebesine müte‘allika da‘vâdan mersûmun zimmetini kabûlü hâvî ibrâ ve ıskāt etmemizle bâkīsi olan yedi yüz guruşu dahi hâlen ve def‘aten edâya kudreti olmayıp ber-vech-i âtî tecîl ve taksîte tâlib olduğunda biz dahi deyn-i meblağ-ı bâkī-i mezkûr yedi yüz guruşu beher şehr otuzar guruş verip mecmû‘unu işbu târihden yirmi üç ay on gün hitâmına değin tamamen bize edâ ve îfâ etmek üzre rızâmızla mersûmu tecîl ve taksît eyledik dediklerinde ol dahi deyn-i meblağ-ı bâkī-i mezkûr yedi yüz guruşu ikrâr ve i‘tirâf ve ecl-i mezkûru kabûl ve ber-vech-i muharrer müeccelen ve mukāssatan müdde‘iyân-ı mezbûrâna edâya müte‘ahhid olduğu İstanbul Mahkemesi’nden huzûr-ı âlîlerine i‘lâm olundu. Fî 28 Ş sene 1242