İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 406 Hüküm no: 352 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Aci Kozma ile ortağı İbrahim Kaptan b. Hüseyin’in 800 guruşa sulh olduğu 800 guruşa sulh ve hukūk-ı şirketden ibrâ Ma‘rûz Mübârek rikâb-ı kamer-tâb hazret-i zıllullahîye takdîm-i arzuhâl eden sefîne reislerinden Dimitri v. Ac Kozma zimmî evvelen Çarşamba günü Arz Odası’nda huzûr-ı lâmi‘u’n-nûr-ı vekâlet-penâhîlerinde ve ba‘dehû bi’t-terâzî dâ‘îhânelerinde ma‘kūd meclis-i şer‘-i münîrde Kapan-ı dakīk tüccârından İbrahim Kaptan b. Hüseyin nâm kimesne muvâcehesinde reisler kethudâsı es-Seyyid el-Hâc Veliyüddin Ağa kullarıyla mazbûtü’l-esâmî kapan tüccârı hazır oldukları hâlde martiko ta‘bîr olunur mukaddemâ rub‘u benim ve selâse-i erbâ‘ı merkūm İbrahim Kaptan’ın olup ba‘dehû ben rubu‘ hisse-i mezkûremi mezbûra bey‘ eylediğim bir kıt‘a sefîne vech-i meşrûh üzre iştirâken mâlımız iken otuz yedi senesi Ramazanında mezbûr İbrahim Kaptan ile bi’l-mukāvele İstanbul’dan ben reis olarak Taygan İskelesi’ne gidip ma‘lûmü’l-mikdâr buğday tahmîl ve Âsitâne-i sa‘âdete nakl ve tesbîl edip bey‘ ve sermâye ve mesârifi ihrâc olundukdan sonra lede’l-muhâsebe benim hisseme iki bin yedi yüz doksan yedi buçuk guruş isâbet edip ve mezbûr İbrahim Kaptan’ın zimmetine ta‘alluk etmekle meblağ-ı merkūm iki bin yedi yüz doksan yedi buçuk guruşu mezbûr İbrahim Kaptan’dan taleb ederim deyü tesâddî eylediğim da‘vâmdan bâ-tavassut-ı muslihîn merkūm İbrahim Kaptan ile bi’t-tav‘ ve’r-rızâ sekiz yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūm sekiz yüz guruşdan mâ‘adâ bi’l-cümle husûs-ı mezkûra ve şirket hukūkuna ve işbu târihe gelince sâir beynimizde cereyân eden cemî‘ ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika mutlaka âmme-i de‘âvî <> ve mutâlebâtdan ve kâffe-i eymân ve muhâsamâtdan tarafeynden her birimiz âharın zimmetini ibrâ-i âm ile kabûlü hâvî ibrâ ve ıskāt eyledik deyü takrîrini mezbûr İbrahim Kaptan tasdîk etmeğin bu sûretde ibrâdan müstesnâ bedel-i sulh-ı merkūm sekiz yüz guruşun bi’t-taleb müdde‘î-i mersûm Dimitri zimmîye edâsıyla mezbûr İbrahim Kaptan ilzâm olunduğu İstanbul Mahkemesi’nden huzûr. Fî 13 min-Şevvali’l-mükerrem sene 1242 Nüshateyn