İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 407 Hüküm no: 353 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Karabet ile eşi Turfanda bt. Anapana’nın, Derviş Osman b. Ebubekir’den alacaklarını tahsil ettikleri 30 guruş ile yarım vakıyye ipek teslîmi ve ücretden ibrâ Ma‘rûz Mübârek rikâb-ı şevket-meâb-ı hazret-i hilâfet-penâhîye takdîm-i arzuhâl eden sandalcı esnâfına mülhak dolayıcı ta‘bîr olunur ipek bükücü esnâfından İstefan v. Karabet nâm zimmî meclis-i şer‘-i münîrde zevcesi şahsı mu‘arrefe Turfanda bt. Anapana nâm Nasrâniye hâzıra olduğu hâlde derûn-ı arzuhâlde mezkûru’l-ism çulha esnâfından Derviş Osman b. Ebîbekir nâm kimesne muvâcehesinde ben bundan akdem zevcem hâzıra-i mersûme ile ma‘an merkūm Derviş Osman’a üç ay mikdârı ücretle ipek bükmemizle ücretimizden zimmetinde bin dört yüz guruş alacağımız var zannıyla işbu arzuhâli takdîm ve iddi‘â etmişdik lâkin bu def‘a taraf-ı şer‘-i şerîfden havâle ile kethudâ ve yiğitbaşı ve ihtiyâr ustalarımız muvâcehelerinde yegān yegān hesâbımız görüldükde fakat otuz guruş nakd ve yarım vakıyye ipek alacağımız çıkıp mâ‘adâ bir nesne hakkımız olmadığı zâhir ve âşikâr olmağla mezbûr Derviş Osman dahi meblağ-ı merkūm otuz guruşu an-nakd ol mikdâr ipeği dahi aynen huzûr-ı şer‘-i şerîfde bize teslîm ve biz dahi ahz ü kabz etmemizle bi’l-cümle husûs-ı mezkûra ve ziyâde ücret mutâlebesine ve sâir kâffe-i hukūk-ı şer‘iyeye müte‘allika âmme-i da‘vâdan ben ve zevcem hâzıra-i mersûmeden her birimiz merkūm Derviş Osman’ın zimmetini ol dahi kezâlik bizim zimmetimizi ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü mukırr-ı mesfûr İstefan zimmînin bi’l-cümle takrîr-i meşrûhunu mezbûr Derviş Osman ile hâzıra-i mersûme Turfanda Nasrâniyeden her biri tasdîk ve külliyen kat‘-ı nizâ‘ eyledikleri İstanbul Mahkemesi’nden huzûr. Fî 21 min-Şevvali’l-mükerrem sene 1242