Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 379 Hüküm no: 434 Orijinal metin no: [69a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meryem bt. Hacı Sinan’ın kaynatasında olan alacağını taksitlendirmesi Mahmiye-i İstanbul’da Hoca Ali mahallesinde sâkine Meryem bt. el-Hâc Sinan nâm hâtunun karındaşı ve tarafından husûs-ı âti’l-beyâna vekîl-i müsecceli olan Halil Çelebi b. el-Hâc Sinan meclis-i şer‘-i şerîfde müvekkile-i mezbûrenin kayınatası işbu bâ‘isü’l-kitâb kethüdâ Ahmed Ağa b. Abdurrahman mahzarında bi’l-vekâle ikrâr ve takrîr-i kelâm edip müvekkilem mezbûre Meryem Hâtun’un kayınatası merkūm Ahmed Ağa zimmetinde beynlerinde hâvî olan mu‘âmelât-ı şettâdan ba‘de küllî hesâb altı yüz esedî guruş hakkı olmağla bundan akdem meblağ-ı mezbûr için merkūm Ahmed Ağa sicn-i sultânî’de birkaç ay mahbûs oldukdan sonra meblağ-ı mezbûrun ancak iki yüz guruşunu müvekkile-i mezbûreye edâ ve teslîm ol dahi istîfâ ve kabz edip bâkī dört yüz guruşunu bir vechile edâya iktidârı olmamağla te’cîl ve taksîte tâlib olmağın müvekkile-i mezbûre Meryem meblağ-ı bâkī-i mezbûru beher otuz gün tamâmına on guruş olmak üzre târih-i kitâbdan bin iki yüz gün tamâmına değin te’cîl ve taksît eyledikde merkūm Ahmed Ağa dahi kabûl ve meblağ-ı bâkī-i mezbûr dört yüz guruşu vech-i muharrer üzre edâ ve teslîme ta‘ahhüd eyledi dedikde gıbbe’t-tasdîki’ş-şer‘î ketb [olundu]. Fi’l-yevmi’s-sânî min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İsmail Efendi el-İmâm, Ali Efendi b. Mehmed, Mahmud Efendi el-Müezzin, el-Hâc Ali Efendi el-Müezzin, Şaban Çelebi b. Âbid.