Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 379 Hüküm no: 435 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Hasan’ın Meryem bt. Mustafa’da olan alacağını vasîsinden tahsili Mahmiye-i İstanbul’da Murad Paşa-yı Atîk mahallesinde sâkin Aksarayî Çavuş Ahmed b. Hasan meclis-i şer‘-i şerîf-i enverde mahmiye-i mezbûrede Ereğli mahallesinde sâkine iken bundan akdem bilâ-vâris fevt olan Meryem bt. Mustafa b. el-Hâc Hüseyin nâm hâtunun vasiyy-i muhtârı olmağla terekesine vâzı‘ü’l-yed olan bâ‘isü hâze’l-kitâb Yorganî Mustafa Çelebi b. Ahmed mahzarında ikrâr ve takrîr-i kelâm edip müteveffât-ı mezbûre Meryem Hâtun hayâtında mezbûr Mustafa Çelebi zimmetinde hakkı olan on beş bin akçenin beş bin akçesini Ebâ Eyyûb-i Ensârî’de Çömlekçiler kurbunda vâki‘ ma‘lûmü’l-hudûd mülk menzili ba‘de vefâtihâ bey‘ olunup semeni ve sâir terekesi bana verile deyû vasiyyet ve tenfîzine mezbûr Mustafa Çelebi’yi vasiyy-i muhtâr, ol dahi kabûl edip musırraten alâ vasiyyetihâ fevt olmağla vasiyy-i mezbûr Mustafa Çelebi dahi zimmetinde olan meblağ-ı mezbûrun beş bin akçesini ve menzil-i merkūmu yetmiş guruşa âhara bey‘ etmekle semeni olan meblağ-ı mezbûrun elli guruşunu bi’l-vesâye bana teslîm ben dahi yedinden ahz u kabz eylediğimden sonra bâkī yirmi guruşdan ve müteveffât-ı mezbûrenin sâir terekesine müte‘allika cemî‘ da‘vâdan mezbûr Mustafa Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîki’ş-şer‘î bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Bey b. Mustafa, Seyyid Mehmed Çelebi b. Ahmed, Ali Çelebi b. Mehmed, Ramazan b. Hüseyin, İsmail b. Mehmed, Ali b. Haydar, Mustafa b. Ömer.