İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 411 Hüküm no: 358 Orijinal metin no: [68a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Usta’ya, satın aldığı berber gediğini Bâbıâli civarından Hocapaşa’ya nakli hususunda izin Ber-mûcib-i emr-i âlî Bâb-ı Âsafî civârından Hocapaşa’ya berber gediği nakli Ma‘rûz Sâdır olan fermân-ı âlîlerine imtisâlen evvel-emirde işbu arzuhâl ve der-dest olan diğer arzuhâl ve i‘lâm ve takrîr ve derkenâra nazar olundukda Bâb-ı Âlî’ye ilâve olunmak için bu def‘a bâ-irâde-i aliyye tefevvüz olunan Bâb-ı Âlî civârında kâin Başmuhâsebe’de mukayyed ve mu‘teber on dört bâb berber dükkânları gediklerinin Ayasofya-i Kebîr civârında vâki‘ mesdûd kahve dükkânlarına yahud mahâll-i sâireye mülk sahiblerinin rızâlarıyla nizâmına tatbîkan nakilleri husûsu va‘d buyurulmuş olduğundan keyfiyet-i kuyûd ve nizâmı Başmuhâsebe’den derkenâr ve iktizâsı mi‘mâr ağa kullarından isti‘lâm olunarak ber-mûcib-i va‘d-i âlî nakli husûsu sa‘âdetlü defterdâr efendi bendeleri tarafından takrîr [ve] inhâ ve ol bâbda ruhsat-i seniyye i‘tâ buyurulmağla dekâkîn-i mezkûreden hâmiş-i arzuhâlde mastûr Başmuhâsebe derkenârında musarrah Paşa Kapısı kurbünde kebabçı sırasında Hüseyin Usta ismine mukayyed bir bâb muhterik berber dükkânı gediği ta‘bîr olunur harîkden tahlîs olunmuş olan âlât-ı lâzıme-i ma‘lûmeye tedâvül-i eydî ile el-yevm şirâen mâlik olan sahib-i arzuhâl Ali Usta kulları âlât-ı gedik-i mezkûru kurb ve civârında Hocapaşa caddesinde çörekçi fırını sırasında vâki‘ bir tarafı camcı ve bir tarafı berber dükkânları ve verâsı Ahmed Efendi menzili ve pîşgâh-ı tarîk-ı âm ile mahdûd merhûm Defterdâr Abdüsselam Efendi Vakfı’ndan şehriye yirmi dört akçe icâreli bir bâb kaymakçı dükkânı arsasına bu def‘a müceddeden inşâ olunacak bir bâb dükkâna nakli husûsunu istirhâm etmekle nizâmına tatbîk için muahharan naklolunacak dükkân-ı mezkûrun bâ-temessük-i mütevellî bi’l-icâreteyn mutasarrıfı Hocapaşa müezzini Halil Efendi b. Osman ve esnâf-ı merkūme kethudâsı İbrahim Ağa ve şeyhi el-Hâc Abdi Efendi ve du‘âcısı İsmail Efendi ve yiğitbaşısı Nuri Ağa ve çavuşu Molla Mustafa ve köşe ustası Mehmed Ağa ve sâirleri du‘âhânemize celb ile suâl olundukda fi’l-vâki‘ âlât-ı gedik-i mezkûr merkūm Ali Usta’nın el-yevm mâlı olup ber-vech-i istid‘â nakli şurût-ı nizâmlarına dahi muvâfık olduğunu esnâf-ı merkūmûn ihbâr ve ber-vech-i muharrer nakline izin ve rızâsı olduğunu mutasarrıfı merkūm Halil Efendi takrîr ettikden sonra dükkân-ı mezkûrun keyfiyetini mahâllinde [68b] tahkīk için taraf-ı dâ‘iyânemden mürsel Kâtib es-Seyyid Salih Afif Efendi dâ‘îleri [ve] hâssa mi‘mârı hulefâsından Derviş Ahmed ve Mehmed Necib Halîfeler ile dükkân-ı mezkûra varıp arsasını keşf ve misâha ve kurb ve civârında bulunan bî-garaz Müslimînden suâl ettikde arsa-i mezkûre terbî‘an kırk iki zirâ‘ olup kahvehâne şeklinde olmayarak âdet üzre bir bâb berber dükkânı olabilir mikdâr olmağla bir gûne beis ve mahzûru olmayacağını mi‘mârân-ı merkūmân ve Müslimîn-i merkūmûn inhâ eylediklerinden mâ‘adâ kahvehâne şeklinde olmayarak mu‘tâd üzre berber dükkânı inşâsına merkūm Ali Usta kulları ta‘ahhüd eylediğini mevlânâ-yı mûmâ-ileyh dâ‘îleri mahâllinde tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip alâ-vukū‘ihî inhâ ve takrîr eylediği ma‘lûm-ı devletleri buyruldukda ber-mûcib-i va‘d-i âlî ve ber-muktezâ-yı şurût-ı nizâm istid‘âsına müsâ‘ade-i seniyyeleri erzânî buyrulduğu hâlde <> gedik-i mezkûr mahâll-i sâbıkından dükkân-ı mezkûra nakl ile mahâl ve ism-i evvelin kaydları ref‘ ve terkīn ve mahâll-i sânî-i mezkûrda müstakar ve mu‘teber olmak üzre mâliki merkūm Ali Usta’nın ismine tashîhan kayd ile yedine sûret i‘tâsı iktizâ eylediği İstanbul Mahkemesi’nden huzûr. Fî 24 Şevvali’l-mükerrem sene 1242