İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 412 Hüküm no: 359 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kosta v. Peraşkova’nın, kasab gediği hissesini Savav. Kiziro’ya devrettiği Kasab ferâğı Ma‘rûz Hudâvendigâr-ı esbak cennet-mekân Sultân Abdülhamid Han -tâbe serâhu- hazretleri evkāf-ı şerîfelerinden Yedikule hâricinde vâki‘ gayrı-ez selhhâne-i mîrî on aded ganem selhhânelerinden dördüncü selhhâneye merbût mahrûse-i Galata’da Karaki kapısı dâhilinde helvâcı karşısında kâin bir bâb kasab dükkânı derûnunda mevcûde gedik ta‘bîr olunur âlât-ı lâzıme-i ma‘lûmenin on altı sehm i‘tibârıyla bir sehm hisse-i şâyi‘asına mutasarrıf olan Kosta v. Peraşkova zimmî tarafından husûs-ı âtîde vekîl olduğu kasab esnâfından Mehmed Said b. el-Hâc Hasan ve Mehmed b. Mustafa nâm kimesneler şehâdetleriyle sâbit olan es-Seyyid Halil b. es-Seyyid Halil nâm kimesne meclis-i şer‘-i münîrde Sava v. Kiziro zimmî muvâcehesinde kasablar kethudâsı el-Hâc Hasan Ağa hazır olduğu hâlde takrîr-i kelâm edip ber-vech-i muharrer müvekkilim mersûmun mutasarrıf olduğu bir sehm hisse-i mezkûreyi bâ-hüsn-i rızâ ve tayyib-i hâtır [ve] ferâğ-ı kat‘î-i mu‘teber ile bedel-i ma‘lûm ve makbûz mukābelesinde bi’l-vekâle mersûm Sava zimmîye ferâğ ve tefvîz ve vech-i lâyıkı üzre teslîm eylediğimde ol dahi ber-vech-i muharrer tefevvüz ve kabûl etmeğin fîmâ-ba‘d bir sehm hisse-i mezkûre re’y-i mütevellî ile mersûm Sava zimmînin dâhil-i havza-i tasarrufu olup müvekkilim mersûmun alâkası kalmamışdır deyü ba‘de’t-takrîr ve’t-tasdîk bir sehm hisse-i merkūme müvekkil-i mersûmun ferâğından defter-i vakf-ı şerîfde mesfûr Sava zimmî uhdesine kayd ile yedine temessük i‘tâsını istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-gurreti B sene 1242